Anar Məmmədlinin mülki klinikada müayinəsindən imtina edirlər

Noyabrın 1-də  Bakı Apellyasiya Məhkəməsində Seçkilərin Monitorinqi və Demokratiyanın Tədrisi  Mərkəzinin direktoru Anar Məmmədlinin  mülki xəstəxanada müayinə olunması ilə bağlı məhkəmə nəzarəti qaydasında verilən şikayəti təmin edilməyib.

“Anar Məmmədlinin vəziyyətinin pisləşməsilə əlaqədar  mülki klinikaya köçürülməsi üçün  müraciət etdik. Amma bu, olmadı və biz Xətai Rayon Məhkəməsinə şikayətlə müraciət etdik. Lakin məhkəmə şikayəti icraata qəbul etmədi və biz bu qərardan şikayət etdik", -vəkil Cavad Cavadov Turan-a bildirib.

Onun sözlərinə görə, məhkəmə iclasında Məmmədlinin vəziyyəti pisləşib. "Anar Məmmədli özü prosesdə iştirak edərək bildirdi ki, ağrıdan dayana bilmir, səhhətində ciddi problemlər vardır. Adekvat müayinə və müalicə almır. Hətta konvoy taborundan onu mümkün qədər tez Bakı İstintaq Təcridxanasına qaytarmağı xahiş etdi. Dünən doğmaları ilə görüşdə ayrılmış vaxtın sonuna qədər otura bilmədi və kameraya qayıtdı. Təəssüf ki, Apellyasiya Məhkəməsi şikayəti təmin etmədi", - Cavadov deyib.

Onun sözlərinə görə, müdafiə tərəfi ümid edir ki, Baş Tibb İdarəsi Məmmədlinin səhhətilə bağlı vəziyyəti nəzərə alaraq, onun mülki klinikada müayinədən keçməsinə şərait yaradacaq.

Bundan əvvəl müdafiə tərəfi bildirib ki, Anar Məmmədli şiddətli bel ağrılarından, başgicəllənmədən əziyyət çəkir, boğazında da güclü ağrılar, şişkinlik var.

* Anar Məmmədli aprelin 29-da saxlanılıb, aprelin 30-da isə Cinayət Məcəlləsinin 206.3.2-ci maddəsilə (qaçaqmalçılıq- qabaqcadan əlbir olan bir qrup şəxs tərəfindən törədilmiş) ittiham olunub.

Bir sıra beynəlxalq təşkilatlar, eləcə də ABŞ Dövlət Departamenti Azərbaycan hökumətini Məmmədlini və digər məhbusları dərhal azad etməyə çağırıb.

Anar Məmmədli seçki hüququ sahəsində qeyri-hökumət təşkilatının rəhbəri və seçkilər haqda tənqidi hesabatların müəllifidir.