Anar Məmmədlinin səhhəti pisləşir

Seçkilərin Monitorinqi və Demokratiyanın Tədrisi Mərkəzinin direktoru, hazırda həbsdə olan   Anar Məmmədlinin səhhəti gün-gündən pisləşir. Bu barədə  vəkil Elçin Sadıqov bildirib.

Onun sözlərinə görə, oktyabrın 14-də  1 saylı Bakı İstintaq Təcridxanasında  hüquq müdafiəçisi  Anar Məmmədli ilə görüşüb.

Vəkil deyir ki, Anar Məmmədlinin belində, boğazında  ağrılar var.  Eyni zamanda baş hərlənməsindən də əziyyət çəkir.

“Anar Məmmədlinin səhhəti gün-gündən pisləşir. Onun müayinə olunması, analizlər alınması, yoxlanılması və müalicəsi ilə bağlı etdiyimiz müraciətlərin heç bir nəticəsi yoxdur”,- vəkil qeyd edib.

Elçin Sadıqov deyib ki, yaxın zamanlarda Anar Məmmədlinin həbsinin ev dustaqlığı ilə  əvəz edilməsi ilə bağlı məhkəməyə  müraciət ediləcək.

Bununla belə,  vəkil  Anar Məmmədlinin barəsində istintaq  hərəkətlərinin aparılmadığını deyir.

Vəkilin dediklərinə istintaq orqanı tərəfindən reaksiya verilməyib. Bununla yanaşı, ibtidai istintaqın nə vaxt başa çatacağı ilə bağlı hələlik açıqlama verilməyib. Adətən istintaq başa çatandan sonra cinayət işi məhkəməyə göndərilir və vəkillərin istintaq işi ilə tanış olması üçün imkan yaradılır. Amma bunlar hələ baş verməyib.

Öz növbəsində, Penitensiar Xidmət Anar Məmmədlinin vəkilinin dediklərinə hələ münasibət bildirməyib.

*Anar Məmmədli aprelin 29-da saxlanılıb. Aprelin 30-da ona qarşı Cinayət Məcəlləsinin 206.3.2-ci (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.

Bir sıra beynəlxalq təşkilatlar, həmçinin ABŞ Dövlət Departamenti, ABŞ səfirliyi Azərbaycan hökumətini Anar Məmmədlini və digər həbs edilən şəxsləri dərhal azad etməyə çağırıb.

Anar Məmmədli Azərbaycanda seçki hüququ sahəsində ixtisaslaşmış qeyri-hökumət təşkilatının rəhbəridir. O, seçkilərlə bağlı tənqidi hesabatların müəllifidir.

Azərbaycanlı rəsmilər isə bir qayda olaraq Azərbaycanda söz və mətbuat azadlığının hədəf alınması, jurnalistlərin və fəalların əsassız həbsi ilə bağlı ittihamları rədd edirlər, Azərbaycanda fundamental hüquq və azadlıqların, eləcə də media azadlığının “tam olaraq” təmin edildiyini vurğulayırlar.