Ankara və Aşqabad Türkmənistan qazının Avropaya nəqli yollarını müzakirə edir

Türkiyə prezidenti Erdoğan Türkmənistana rəsmi səfərə gedib. Cümə günü bu ölkənin prezidenti Berdımuhəmmədovla danışıqlar zamanı o, Türkmənistan qazının Avropaya Türkiyə vasitəsilə nəqlinin tərəfdarı olduğunu bildirib.

Onun sözlərinə görə, bu, Avropanın enerji təhlükəsizliyini təmin edəcək.

“Biz Türkmənistan qazının Avropaya Türkiyə vasitəsilə nəqlinə və Avropanın enerji təhlükəsizliyinin təmin edilməsinə böyük əhəmiyyət veririk”, deyə o bildirib.

Türkmənistan qazının nəqlinin təşkili üçün TANAP qaz kəmərindən istifadə olunacaq. Bu kəmərin tikintisi artıq başlayıb və böyük sürətlə davam edir.

Türkiyə Azərbaycan qazının Qərbə nəqlində mühüm rol oynayır və gələcəkdə bu, Türkmənistan qazına da aid olacaq, deyən Erdoğan Türkmənistan qazının Türkiyəyə çatdırılması marşrutunu dəqiqləşdirməyib.

Danışıqların yekunlarına görə, “Türkmənqaz” dövlət konserni və Türkiyənin “Ataqaz” şirkəti təbii qazın alqı-satqısı sahəsində əməkdaşlıq haqqında çərçivə sazişi imzalayıblar.

Qeyd edək ki, Avropa İttifaqı, ABŞ dənizin dibi ilə Türkmənistandan Azərbaycana qədər Transxəzər qaz kəmərinin tikintisi üzrə fəal lobbiçilik edir. Daha sonra bu kəmər Cənub Qaz Dəhlizi sistemi ilə birləşdiriləcək və Gürcüstan vasitəsilə Türkiyəyə daxil olacaq. Daha sonra TANAP boru kəməri ilə qaz Avropaya daxil olacaq.

Hazırda TANAP Azərbaycanın Şahdəniz yatağından Gürcüstan vasitəsilə Türkiyəyə, oradan isə TAP (Transadriatik boru kəməri) Yunanıstana, Albaniyaya və İtaliyanın cənubuna qaz nəqli məqsədilə tikilir.

Bu boru kəmərləri ilə Türkiyəyə 6 milyard kubmetr qaz və Avropaya 10 milyard qaz nəql etmək planlaşdırılır. Gələcəkdə qaz kəmərinin gücü 31 milyard kubmetrə qədər artırıla bilər. -02D-