Anxel Moratinos: Bakı Forumu çox doğru vaxtda başlayır

Bakı/02.05.19/Turan: Sivilizasiyalar Alyansının rəhbəri Migel Anxel Moratinos Bakıda keçirilən mətbuat konfransında Azərbaycanda Mədəniyyətlərarası Dialoq Forumunun keçirilməsinin əhəmiyyətini qeyd edib.

"Şri-Lanka həmişə açıq ölkə olub, burada müxtəlif dinlər və mədəniyyətlər mövcud olub və qəfildən orada belə bir faciə baş verdi", deyən Moratinos yüzlərlə insanın ölümünə səbəb olmuş terror aktlarını nəzərdə tutub.

Ədavət hər zaman mövcud olub, bu hiss rəqiblərini məhv etmək həvəsi doğurur. Buna görə mədəniyyətlərarası dialoqun dəqiq strategiyasını işləyib hazırlamaq çox vacibdir, deyə o bildirib.

Moratinos mövcud problemləri hərbi, maliyyə və siyasi vasitələrlə həll etməyin mümkün olduğu barədə düşüncəni "bəsitləşdirilmiş" adlandırıb. Sosial-mədəni yanaşma tətbiq etmək və bu problemlərin kökünə enmək lazımdır.

"Qonşularımızın dünya görüşünün necə olduğunu, bu və ya digər problemlərin necə yarandığını, bu vəziyyətə nəyin gətirib çıxardığını və bunun hansı nəticələrinin ola biləcəyini başa düşməsək, hansısa uzunmüddətli həll yolu tapmaq qeyri-mümkün olacaq", deyə Moratinos qeyd edib.

O, Roma papası Fransisk və Əl-Cəzairin Ali imamının tarixi birgə bəyannaməsini nümunə göstərib. Bu sənəddə "qardaşlıq, qarşılıqlı anlaşma və keçmiş fikir ayrılıqlarını aradan qaldıraraq, gələcək qurmaq niyyəti" əksini tapır.

"Və söhbət təkcə islamdan və Katolik kilsədən getmir. Onlar daha da irəli getmək və digər dini etiqadlar dinlərarası dialoqun təşviqində onlara qoşulmağı təklif etmək istəyirlər", deyə o bildirib.

Moratinos hesab edir ki, BMT-nin dəstəyi ilə keçirilən Bakı Forumu bu prosesə əhəmiyyətli töhfə verəcək: "Forum beynəlxalq ictimaiyyətə mühüm siqnal göndərəcək: biz birdikdə yaşaya bilərik, biz bir-birimizə hörmət edə bilərik, biz müxtəlif mədəniyyətləri və dinləri başa düşməyi öyrənməliyik". -02D-