Apellyasiya Məhkəməsi Azərbaycan Xalq Cəbhəsi Partiyasının  fəalının barəsində hökmü yumşaldıb

Bakı Apellyasiya Məhkəməsində Azərbaycan Xalq Cəbhəsi Partiyasının fəalı Elbəyi Kərimlinin barəsində hökmdən şikayətə baxılması başa çatıb.

Məhkəmə çəkişməsinin yekunlarına əsasən, apellyasiya instansiyası Azərbaycan Cinayət Məcəlləsinin 234.4.3-cü maddəsini (külli miqdarda narkotik maddənin satış məqsədilə  qanunsuz olaraq əldə edilməsi, saxlanılması) daha yumşaq 234.1-1-ci maddəyə (külli miqdarda narkotik maddənin satış məqsədi olmadan qanunsuz olaraq əldə edilməsi) tövsif edib və həbs cəzasının müddətini 6 ildən 5 ilə endirib. Bu barədə Turan-a vəkil Nemət Kərimli bildirib.

Onun sözlərinə görə, bununla belə, müdafiə tərəfi Ali Məhkəməyə kassasiya şikayəti verəcək.

"Biz Elbəyi Kərimliyə bəraət verilməsinə israr edəcəyik. Axı, bu gənc, ümumiyyətlə, cinayət törətməyib, narkotik maddələrlə heç bir əlaqəsi yoxdur", - vəkil deyib.

Bundan əvvəl məhkəmədə Kərimli ittihamı rədd edərək siyasi motivlərlə saxtalaşdırıldığını bildirib.

Elbəyi Kərimlinin sözlərinə görə, onun həbsinin əsl səbəbi ötən ilin avqustunda Heydər Əliyevin abidəsinə "Stalin" sözünü yazmasıdır.