Apellyasiya Məhkəməsi jurnalist Sərdar Əlibəylinin vəsatətini təmin etməyib

Bakı Apellyasiya Məhkəməsi (BAM) P.S Nota qəzetinin və onun www.psnota.com İnternet versiyasının baş redaktoru Sərdar Əlibəylinin təkrar məhkəmə istintaqının aparılması barədə vəsatətini təmin etməyib. Bu qərar yanvarın 13-də Vüqar Məmmədovun sədrliyi ilə BAM-ın ilkin iclasında qəbul olunub. Bu barədə Turan-a jurnalistin vəkili Elçin Sadıqov bildirib.

“Məsələ bundadır ki, Xətai məhkəməsinin hökmündə proses zamanı zərərçəkənlərin və şahidlərin ifadələri əksini tapmayıb. Hakim, sadəcə, sözügedən şəxslərin ittihamnamədə qeydə alınan ifadələrini nəzərə alıb, halbuki, onlar proses zamanı başqa şeylər deyiblər”, - E.Sadıqov bildirib.

Lakin V.Məmmədov vəsatəti təmin etməyib və şikayətə mahiyyəti üzrə baxılmasını yanvarın 27-nə təyin edib.

Vəkil deyib ki, BAM-ın ilkin iclasının qərarından Ali Məhkəməyə şikayət veriləcək və ona baxılana qədər apellyasiya instansiyasında dinləmələr təxirə salınacaq.

S.Əlibəyli 2013-cü il iyulun 31-də Bakıda Natiq Əmirov adlı şəxsin şikayəti əsasında saxlanılıb. Ona qarşı CM-in 221.3 maddəsi (silah və ya silah kimi istifadə olunan əşyanın tətbiqi ilə xuliqanlıq) ilə ittiham irəli sürülüb.

  Noyabrın 13-də Bakının Xətai Rayon Məhkəməsi onu 4 il müddətinə azadlıqdan məhrum edib.

S.Əlibəyli tənqidi və təhqiredici yazlarına görə dəfələrlə təqiblərə məruz qalıb.

S.Əlibəylinin həmkarları güman edirlər ki, bu dəfə həbsə səbəb Facebook-da  dövlət başçısı İlham Əliyevin ünvanına tənqidi fikirlərin və kollajın yerləşdirilməsi, həmçinin siyasi mühacir İsa Sadıqovun yazlarının dərcidir.

Amnesty International hüquq-müdafiə təşkilatı S.Əlibəylini “siyasi məhbus” kimi tanıyıb.06В—