Apellyasiya Məhkəməsi jurnalistlər Orucovu və Eminovu həbsdə saxlayıb

Mayın 27-də Bakı Apellyasiya Məhkəməsi  "Kanal 13" İnternet televiziyasının rəhbəri Əziz Orucovu və bu mediaqurumun əməkdaşı Şamo Eminovun həbs müddətlərinin 1 ay uzadılmasından verilmiş şikayətləri təmin etməyib. Bu barədə Turan-a Orucovun həyat yoldaşı Lamiyə Orucova və Eminovun vəkili Əlibaba Rzayev bildirib.

Müdafiə tərəfi jurnalistlərin həbs edilməsini və ümumiyyətlə onların cinayət məsuliyyətinə cəlb edilməsini əsassız hesab edir.

 Həm də hər iki jurmalistin səhhətində ciddi problemlər var - Orucov martın ortalarından həbsxana xəstəxanasındadır.

* Əziz Orucov 27 noyabr 2023-cü il tarixində saxlanılıb və qanunsuz tikinti aparmaqda ittiham olunub, məhkəmə onu üç ay müddətinə həbs edib. 

Dekabrın 19-da ona qarşı CM-in 206.3.2-ci maddəsi ilə yeni ittiham irəli sürülüb (qaçaqmalçılıq - əvvəlcədən əlbir olan bir qrup şəxs tərəfindən törədildikdə). Orucovu 8 ilədək azadlıqdan məhrumetmə cəzası gözləyir.

Əziz Orucov 2017-ci ildə qanunsuz sahibkarlıq ittihamı ilə 6 il müddətinə azadlıqdan məhrum edilmişdi. 2018-ci ildə Ali Məhkəmə ona qarşı ittihamların bir qismini kəğv edib və real müddəti şərti cəza ilə əvəz edib. 

** Kanal-13-lə əməkdaşlıq edən sərbəst jurnalist Şamo Eminov dekabrın 22-də saxlanılıb və "qabaqcadan əlbir olan bir qrup şəxs tərəfindən valyuta qaçaqmalçılığı" (Azərbaycan CM-in 206.3.2-ci maddəsi) ittihamı ilə üç ay müddətinə həbs edilib.