Prokurorluq Hafiz Babalının şikayətini təmin etməyib

Baş Prokurorluq araşdırmaçı jurnaist Hafiz Babalının həbsinin əsassızlığına dair şikayətini təmin etməyib. Bu barədə Turan-a onun yaxınları bildirib.

Bir ay əvvəl valyuta qaçaqmalçılığı ittihamı ilə həbs olunan Babalı qanunsuz cinayət təqibi ilə əlaqədar baş prokurora müraciət edib.

O hesab edir ki, Bakı Şəhər Polis İdarəsinin müstəntiqi Toğrul Hüseynov və Bakı Şəhər Pokurorluğunun prokuroru Mobil Şəfiyev əsassız olaraq onun həbsinə, daha sonra isə ilkin həbs müddətinin uzadılmasına nail olublar.

Bununla əlaqədar olaraq Babalı müstəntiq və prokuror barəsində xidməti araşdırma aparılmasını və cinayət işinə xitam verilməsini tələb edirdi.

Lakin, yaxınlarının sözlərinə görə, Baş Prokurorluqdan "istintaqın davam etdiyi, onun yekunlarına görə müvafiq qərarın qəbul edilməsinin təmin ediləcəyi" cavabı verilib.

Baş Prokurorluqdan şərh almaq mümkün olmayıb.

* Turan Agentliyinin "iqtisadi xəbərlər" şöbəsinin redaktoru Hafiz Babalı dekabrın 13-də saxlanılıb. Ona qarşı "xarici valyuta qaçaqmalçılığı" ittihamı irəli sürülüb. Məhkəmənin qərarı ilə o, üç ay müddətinə ilkin həbs cəzasına məhkum edilib. Babalı "Abzas Media-nın işi" üzrə cəlb edilib.

Hüquq müdafiəçiləri Babalını siyasi məhbus kimi tanıyıblar.