Apellyasiya Məhkəməsi Tural Abbaslını həbsdə saxlayıb

Bu gün Bakı Apellyasiya Məhkəməsi Müsavat Partiyası gənclər təşkilatının rəhbəri Tural Abbaslının 15 sutka həbsi barədə qərarı qüvvədə saxlayıb. T.Abbaslı avqustun 7-də Nəsimi Rayon Məhkəməsi tərəfindən həbs olunub. O 220 saat ictimai işi yerinə yetirməkdən imtina edib. T.Abbaslı yanvarın 12-də Bakıda gənclərin etiraz aksiyasında iştiraka görə 600 manat cərimə olunub. T.Abbaslı cəriməni ödəməkdən imtina edərək öz toplaşma azadlığı hüququndan istifadə etdiyini bildirib.

Avqustun 16-da apellyasiya şikayətinə baxarkən T.Abbaslı inzibati cəzanın yerinə yetirilməsindən imtina etməsi barədə ittihamı yenidən rədd edib. O bildirib ki, ictimai işlərin yerinə yetirilməsi üçün məhkəmə icraçılarının müəyyən etdiyi müəssisəyə gedib və qeydiyyata düşüb, lakin heç kim ona iş verməyib. Bu barədə Turan-a vəkil Əsabəli Mustafayev bildirib.

Vəkil bildirib ki, T.Abbaslı saxlandığı təcridxanada qeyri-insani davranışa məruz qalır, onu əli qandallı saxlayırlar və ev yeməkləri vermirlər. 

T.Abbaslının anası Başxanım Abbasova isə bildirib ki, oğlu saxlandığı müddətdə çox zəifləyib və arıqlayıb.

T.Abbaslı 2011-ci il aprelin 2-də Bakıda demokratik islahatlar tələbilə keçirilən mitinqin təşkilinə görə 2,5 il müddətinə azadlıqdan məhrum olunub.  2012-ci ilin iyununda əfv edilib. 

Amnesty International onu “siyasi məhbus” kimi tanıyır.—06D—