Aprel döyüşlərindən sonra bir il ərzində Rusiya Ermənistanda hərbi iştirakını gücləndirib

“Atlas” Analitika Mərkəzinin rəhbəri, politoloq Elxan Şahinoğlu “Aprel atəşkəsi” adlı kitab nəşr etdirib. Kitab 2016-cı il aprelıin 2-5-də Qarabağda gedən  hərbi əməliyyatlardan sonra ilin siyasi yekunlarına həsr edilib. 

“Ötən il yaddaşlarda onunla qaldı ki, dördgünlük döyüşlər zamanı azərbaycanlılar 90-cı illərin əvvəlindəki hərbi məğlubiyyətlə bağlı psixoloji təsirlərdən xilas oldu. Əgər 20 ildən sonra Azərbaycan ordusu Ermənistanın ələ keçirdiyi strateji yüksəklikləri qaytara bildisə və düşmənin darmadağın etdiyi kəndin bərpasına başlaya bildisə, deməli, işğal olunmuş digər torpaqları da azad etmək olar”, - müəllif belə düşünür.

Ancaq 2016-cı il ümidlərlə yanaşı məyusluq da gətirdi. Aprel döyüşlərindən sonra güc dövlətləri Ermənistanı Qarabağı işgal planından əl çəkməyə məcbur etmədilər, Dağlıq Qarabağ ətrafındakı rayonlardan qoşunların çıxarılmasını tələb etmədilər.

Müharibə təhlükəsi ATƏT-in Minsk Qrupunun həmsədri olan ölkələrin - Rusiya, Fransa və ABŞ-ın regionda öz siyasətlərini dəyişdirməsi üçün əsas olmadı. Azərbaycan və Ermənistan prezidentlərinin vasitəçilər tərəfindən təşkil edilmiş Vyana və Sankt-Peterburq görüşləri uğursuz oldu.

Aprel döyüşlərindən sonra Rusiya tərəfindən Ermənistana hərbi dəstək artıb. Əvvəlcə Moskva Ermənistanda öz "İsgəndər" raketlərini yerləşdirdi, sonra Ermənistana silah almaq üçün 200 mln. dollar kredit verdi. Bütün bunlardan əlavə, il ərzində Rusiya rəsmilərinin bəyanatları Moskvanın Qarabağ böhranının həllində maraqlı olmadığını göstərdi, Şahinoğlu belə hesab edir.

Ermənistan liderləri ələ keçirilmiş torpaqları vermək niyyətində olmadıqlarını bəlli edirlər, xalqı yoxsulluğa, demoqrafik itkilərə, Türkiyə və Azərbaycanla düşmənçiliyə məhkum edirlər.

Bu il aprelin 2-də Ermənistanda keçirilən, Sarkisyanın Respublika Partiyasının qalib gəldiyi parlament seçkilərinin ilkin yekunları bu fikirləri təsdiq edir.

2016-cı ildə "Atlas" mərkəzinin keçirdiyi azərbaycanlıların Qarabağ nizamlanması prosesindən gözlədikləri barədə ictimai rəy sorğusu göstərib ki, respondentlərin əksəriyyəti ATƏT-in Minsk Qrupuna etibar etmir və münaqişənin dinc yolla həllini mümkün saymır.

"Aprel atəşkəsi" adlı analitik araşdırma "Qanun" (Bakı) nəşriyyatında 200 səhifədə  dərc olunub. Bu, müəllifin Qarabağ nizamlanması haqqında kinci kitabıdır. Birinci "Dağlıq Qarabağ: statussuz status" kitabı 2010-cu ildə dərc olunub. 2015-ci ildə E.Şahinoğlu Ukrayna hadisələrinə həsr olunmuş "Maydandan Maydana" adlı kitab nəşr edib. -0-