Arif Hacılı: Krım demokratiya ilə avtoritarizm müharibəsinin ön cəbhəsidir

Mahacqalada saxlanmağımız hüquq cəhətdən qanunsuzdur. Polis Moskvanın siyasi sifarişini yerinə yetirib. Bu, həm də Azərbaycan vətəndaşlarının Rusiya hökuməti tərəfindən sərbəst hərəkət hüququnun məhdudlaşdırılmasıdır.   

Martın 10-da Krıma gedərkən Mahaçqalada polis tərəfindən saxlanaraq, Bakıya qayıtmağa məcbur edilən Müsavat Partiyası başqanının müavinləri Arif Hacılı və Gülağa Aslanlının bu gün Müsavat Partiyasının mərkəzi qərargahında keçirdiyi mətbuat konfransında bu bəyanatlarla çıxış ediblər.

Arif Hacılı və Gülağa Aslanlı Azərbaycan Xarici İşlər Nazirliyinə hüquqlarının pozulması ilə bağlı müraciət edib-etməyəcəklərini müzakirə edəcəklərini bildirib. “Amma, ümid etmirik ki, Xarici İşlər Nazirliyi müxalifət təmsilçilərinin hüquqlarını müdafiə etsin. Buna baxmayaraq, biz sərbəst hərəkət hüququmuzun məhdudlaşdırlmasına hüquqi qiymət verilməsinə çalışacağıq”, deyə Hacılı qeyd edib.

Martın 10-da Rusiyanın Dağıstan Respublikasının Mahaçqala şəhərində saxlanılan Müsavat Partiyasının başqan müavinləri Arif Hacılı və Gülağa Aslanlı martın 11-də gecə Bakıya qayıdıb.  

Müsavat Partiyası başqanının müavinləri Krımda mövcud durumla tanış olmaq üçün Bakı-Kiyev qatarı ilə Ukraynanın bu regionuna səfərə gedirdilər. Hər iki müavin Mahaçqalada qatardan düşürdülərək polis şöbəsinə aparılıb.

“Polis şöbəsində 15-dək mülki geyimli şəxs var idi. Polis rəisi deyirdi ki, oradakı adamların çoxunu tanımır. Bu adamlar polis, nəqliyyat polisi və Federal Təhlükəsizlik Xidmətinin əməkdaşları idi. Onlar bizə əvvəlcə 5 il həbs veriləcəyini dedilər. Hər 5 dəqiqədən bir Moskvadan zəng gəlirdi. Deyirdilər siz nə edibsiniz ki, bu qədər maraqlanırlar. Tez-tez pasportarımızı alırdılar. Son olaraq 500 manat cərimə ödədik. Amma izahat yazmadıq. Azərbaycanla sərhədədək iki polis bizi nəzarət altında saxladı və dəfələrlə pasportlarımızı alaraq izahat yazmağımızı tələb etdilər”, deyə Hacılı bildirib.

Gülağa Aslanlı təzyiqlərdən danışıb. O, saxlanma zamanı ciddi psixoloji təzyiqlər edildiyini diqqətə çatdırıb. “Onlar bizi inzibati protokola imza atmağa məcbur edirdilər. Pasportlarımızda Avropa ölkələrinə olan vizaları görəndən sonra qərbin ünvanına tənqidlər səsləndirməyə başladılar. Krımda durumun ağır olduğunu, bu məsələyə qarışmamağımızı məsləhət bildilər”, deyə o qeyd edib.  

Müsavat Partiyası bundan sonra da Krım tatarlarının hüquqlarını müdafiə etməkdə davam edəcək. “Krım problemi regional məsələ deyil. Krım demokratiya ilə avtoritarizm müharibəsinin ön cəbhəsidir. Müsavat Partiyası da demokratiyanı dəstəkləyir və bu mübarizdə Krım tatarlarının, Ukrayna xalqının yanındadır”, deyə Arif Hacılı bildirib.

Müsavat Partiyası həmçinin tarixi situasiyadan istifadə edərək Sovet dövründə repressiya nəticəsində Krımdan köçürülən tatarların öz doğma vətənlərinə qayıtması ilə bağlı müraciət qəbul edilməsi məsələsini müzakirə edəcək. “Yüz minlərlə Krım tatarları məcburi şəkildə vətənindən köçürülüb və sonra onlar geriyə vətənlərinə qaytarılmayıb”, deyə o qeyd edib.

Müsavat Partiyası həmçinin Krımda baş verənlərlə bağlı mütəmadi məlumatları ictimaiyyətlə bölüşəcək. -03C-