Art for democracy mədəniyyət xadimlərinə təzyiq haqqında

“Art for democracy” (“Demokratiya naminə incəsənət”) hüquq müdafiə kampaniyası hakimiyyətin təzyiqinə baxmayaraq, müxtəlif incəsənət növləri vasitəsilə demokratiya və insan hüquqları ideyalarını tətbiq etmək qətiyyətindədir. Bu barədə kampaniya təşəbbüskarlarının Reportyorların Azadlıq və Təhlükəsizlik İnstitutunun (RATİ) ofisində təşkil etdiyi bugünki dəyirmi masada bildirilib. Tədbirdə jurnalistlər, vətəndaş cəmiyyəti fəalları, səfirliklərin və beynəlxalq təşkilatların nümayəndələri iştirak ediblər.

“Art for democracy” kampaniyası ötən ilin dekabrında ölkənin üç QHT-si – “İnsan Hüquqları Klubu” (İHK), Reportyorların Azadlıq və Təhlükəsizlik İnstitutu (RATİ) və Milli və Beynəlxalq Araşdırmalar Mərkəzi (MBAM) tərəfindən başlayıb. 

Kampaniyanın koordinatoru və İHK rəhbəri Rəsul Cəfərov birləşdirib ki, ötən üç ayda kampaniya haqqında məlumatlandırma işləri həyata keçirilib, “Demokratiya naminə musiqi” devizi ilə mahnı müsabiqəsi təşkil edilib, onun nəticələri apreldə elan ediləcək.

Cəfərov qeyd edib ki, kampaniya təşəbbüskarları ilk gündən hakimiyyətin təzyiqi ilə qarşılaşıblar. Müsabiqənin təqdimatından dərhal sonra hakim Yeni Azərbaycan Partiyasının mətbu orqanının səhifələrindən onlara böhtan yağdırmağa başladılar.

Bundan başqa, Azərbaycan hakimiyyəti kampaniyanın direktoru Rebekka Vinsentin ölkəyə qayıtmasına mane olur. Bu ABŞ və Böyük Britaniya vətəndaşına Azərbaycana qayıtmasının arzuolunmaz olduğunu hiss etdiriblər.

MBAM direktoru Leyla Əliyeva qeyd edib ki, kampaniyanın məqsədi mədəniyyət vasitəsilə azadlıq ideyasını əhalinin geniş təbəqələrinə aşılamaqdır.

“Əslində bu, hakimiyyət üçün demokratiyanın yayılmasının ən zərərsiz yoludur. Çünki azadlığın mədəniyyət vasitəsilə yayılması hər zaman dinc, qeyri-zorakıdır. Buna görə kampaniyamıza bu qədər amansız reaksiya anlaşılmazdır”, deyə o bildirib.

Daha sonra Cəfərov bildirib ki, mahnı müsabiqəsindən sonra aprel-may aylarında demokratiya haqqında ən yaxşı esse müsabiqələrinin, rəssamların, fotoqrafların, karikaturaçıların sərgilərinin keçirilməsi nəzərdə tutulur. 

“Planlarımız çoxdur, lakin maliyyə imkanları məhduddur və ideyaların həyata keçirilməsi donorların dəstəyindən asılı olacaq”, deyə o bildirib.

Bundan başqa, bu yaxınlarda BMT-nin iqtisadi, sosial və mədəni hüquqlar komitəsinə Azərbaycanda sözügedən sahələrdə vətəndaşların hüquqları ilə bağlı vəziyyət haqqında alternativ hesabat göndəriləcək. Aprelin sonlarında Komitə Azərbaycandakı vəziyyətə baxacaq və hökumətin hesabatı ilə yanaşı QHT-lərin alternativ hesabatlarını da dinləyəcək.

Hesabatda əsas diqqət vətəndaşların abadlaşdırma və infrastruktur layihələri bəhanəsi ilə evlərindən kütləvi şəkildə məcburi köçürülməsi faktlarına yetirilib. Bundan başqa, mədəniyyət xadimlərinə qarşı ayrı-seçkilik faktları olduğu qeyd edilir. Onlar arasında Kinematoqrafçılar İttifaqı və onun rəhbəri Rüstəm İbrahimbəyov, bu yaxınlarda inzibati həbsə məhkum edilmiş reper Dado, məcburi mühacirətdə olan reperlər Camal Əliyev və Azər Cırtdan, qarayaxma kampaniyasına məruz qalan yazıçı Əkrəm Əylisli, Gənc Tamaşaçılar Teatrından qovulan İlqar Cahangir, “Açıq yalanlar” kitabı satışdan yığışdırılmış Bəxtiyar Hidayət və başqaları var.

Müzakirələr zamanı Demokratik Birlik Partiyasının lideri Mirfazil Həmid telekanallarda mədəniyyət sahəsinin inhisarlaşdırıldığını bildirib. Onun sözlərinə görə, telekanallar yalnız yuxarıdan gələn siyahıda adı olan şəxslərə efir verir və gənc istedadların səhnəyə çıxmasına mane olur. -06C-