AŞPA Gürcüstanda dinc etirazların yatırılmasını qətiyyətlə pisləyib

Avropa Şurası Parlament Assambleyası (AŞPA) bu ölkədə dinc etirazların yatırılmasını pisləyib və ölkəni Avropa dəyərlərinə sadiq qalmağa çağırıb.

"Bu gün (29 noyabr) Lüksemburda Daimi Komitə olaraq toplanan Parlament Assambleyası hökuməti seçkiqabağı vədlərinə baxmayaraq, Avropa İttifaqına daxil olmaq haqqında danışıqların dayandırıldığını elan edən Gürcüstandakı vəziyyətlə bağlı narahatlığını bildirir. Bu qərar qanunun aliliyinin möhkəmləndirilməsi və Gürcüstanda demokratik institutların fəaliyyəti üçün zəruri olan islahatların həyata keçirilməsinə ciddi təsir göstərə bilər", deyə Avropa Şurası mətbuat xidmətinin yaydığı məlumatda bildirilir. 

Assambleya Tbilisidə bu qərara etiraz əlaməti olaraq keçirilən dinc nümayişlərin amansızlıqla yatırılmasını fikri ifadə etmək və toplaşmaq azadlığı hüquqlarının pozuntusu kimi qətiyyətlə pisləyir, deyə məlumatda qeyd edilir.

Assambleya həmçinin "nümayişçilərin əksəriyyəti həbs edildiyini və mübahisəli sovet dövrünün İnzibati Xətalar Məcəlləsinin müddəalarına əsasən ittihamlar irəli sürüldüyünü" narahatlıqla qeyd edir və "dəfələrlə bu qanunu Avropa standartlarına uyğun yeni qanunla dəyişdirməyi xahiş etdiyini" xatırladır. 

Bu narahatlıq doğuran hadisələr seçicilərin "təhdidlərdən və əsassız təzyiqdən azad şəkildə şüurlu seçim etməsi" üçün zəruri şərtlərin təmin edilmədiyi bir şəraitdə keçirilən 26 oktyabr parlament seçkiləri fonunda xüsusilə qorxuludur.
Assambleya Gürcüstanı israrla Avropa dəyərlərinə sadiq qalmağa və Avropa Şurasına üzv dövlət kimi öz öhdəliklərinə və vəzifələrinə tam riayət etməyə çağırır.

Assambleya Gürcüstan hakimiyyəti, demokratik qüvvələr və vətəndaş cəmiyyəti, xüsusilə gənclərlə konstruktiv dialoqda Avropa Şurası Baş Katibliyi və Nazirlər Komitəsi ilə sıx əməkdaşlığı davam etdirməyə hazırdır. Assambleyanın Gürcüstanda monitorinq üzrə həmməruzəçilərinin qarşıda duran səfəri bu dialoqu davam etdirmək üçün vacib olan imkanı yaradacaq, deyə press-relizin sonunda bildirilir.