Samirə Qasımlının "stop"u götürülüb, lakin onun xaricə səfəri baş tutmayıb

Azərbaycan DİN politoloq Azər Qasımlının həyat yoldaşı Samirə Qasımlının ölkədən çıxışına qoyulan qadağanı ləğv edib. Lakin onun xaricə səfəri baş tutmayıb, çünki o, aviareysə çata bilməyib. 

S.Qasımlının Turan-ın müxbirinə verdiyi məlumata görə, o, ölkədən çıxışına qadağa qoyulduğunu ictimailəşdirdikdən sonra DİN-dən onun vəkilinə zəng ediblər və "anlaşılmazlıq olduğunu", məhdudiyyətin artıq qaldırıldığını deyiblər.

O, tələsik aeroporta qayıdıb, pasport nəzarətindən uçuş zonasına keçib, lakin həmin vaxta qədər reysinə minik başa çatıb və o, təyyarəyə minə bilməyib.

"Heç bir məhkəmə qərarı olmadan vətəndaşın ölkədən çıxışına qadağa qoyurlar. Sonra da bir neçə dəqiqə ərzində bu qadağa ləğv olunur. Bu əmrləri kimin verdiyi aydın deyil. Kimsə özünü hüquq və qanundan üstün sayaraq, bir düyməyə basmaqla insanların taleyihi həll edir. Belə başa düşürəm ki, həyat yoldaşım Azər Qasımlı xaricdə olduğu zaman onun qayıtmayacağını ehtimal edərək məni burada girov saxlamaq üçün ölkədən çıxışıma qadağa qoyublar. Azər qayıtdıqdan sonra isə onlar ona qadağa qoyublar. Lakin mənim qadağamı ləğv etməyi unudublar", deyə S.Qasımlı öz facebook səhifəsində yazıb.

DİN-dən şərh almaq mümkün olmayıb. 

Samirə Qasımlı siyasi psixologiya üzrə ekspert kimi müstəqil KİV-lərdə şərhləri ilə məşhurdur.

Noyabrın 22-də onun həyat yoldaşı, Siyasi Menecment İnstitutunun direktoru, politoloq Azər Qasımlı da ölkədən buraxılmayıb. Bir neşə gün sonra o, Bakı Şəhər Polis İdarəsində onu bəzi cinayət işləri üzrə şahid qismində dindiriblər. Lakin ona ölkədən çıxışına qoyulan qadağanın səbəbini açıqlamayıblar.