AŞPA Ramil Səfərovun ekstradisiyası və əfvi məsələsini müzakirə edib

Cümə axşamı AŞPA-nın payız sessiyasının plenar iclasında erməni hərbçinin qətlində ittiham olunaraq Macarıstanda ömürlük həbs cəzasına məhkum edilmiş azərbaycanlı  zabit Ramil Səfərovun ekstradisiyası və əfvi məsələsi müzakirə olunub.

Öncədən bildirildiyi kimi, müzakirələrin yekunlarına dair heç bir qətnamə qəbul olunmayıb.

Turan-ın xüsusi müxbirinin Strasburqdan verdiyi məlumata görə, AŞPA-nın Hüquq Məsələləri və İnsan Haqları Komitəsinin rəhbəri Kristofer Çop debatlardan əvvəl bildirib ki, bu məsələnin müzakirəsinə dair təklif komitəyə ötən ay daxil olub.

O, qətl faktını pisləyərək R.Səfərovun ekstradisiyası və əfvi məsələsinin qanunun aliliyi kontekstində müzakirəsini təklif edib.

Çop diqqəti ona yönəldib ki, R.Səfərov məhkumların verilməsi üzrə Strasburq konvensiyasının 12-ci maddəsinin əsasında verilib. Onun fikrincə, bu maddəyə onun AŞ dəyərlərinə uyğunluğu nöqteyi-nəzərindən yenidən baxılmasına zərurət var.

Ümumilikdə, diskussiyalar R.Səfərovun azadlığa buraxılmasının pislənməsi xarakteri daşıyıb. Hətta bəzi deputatlar kəskin ifadələrə əl atıblar.

Fransalı parlamentari Roşbluan R.Səfərovu Azərbaycan hakimiyyətinə verən Macarıstanın mövqeyini tənqid edərək ritorik sual verib: “Neft maqnatına necə inanmaq olardı?”.

Bəzi deputatlar Azərbaycanda R.Səfərovun qəhrəmanlaşdırılmasını tənqid ediblər.

Belə fikirlər də söylənilib ki, Macarıstan hökuməti əvvəlcədən bu məsələ ilə bağlı Ermənistan hakimiyyəti ilə məsləhətləşmələr aparmalı idi. 

Böyük Britaniyadan olan deputat Anderson R.Səfərovun Vətənə ekstradisiyasının “maliyyə məqsədi” güddüyündən,  guya Azərbaycan hakimiyyəti tərəfindən Macarıstana  vəd edilən üç milyarddan danışıb.

Niderlanddan olan deputat Koks “Strasburq konvensiyasının mahiyyətinin” pozulduğunu bildirib. O hesab edir ki, Azərbaycan hökuməti öz qərarına yenidən baxmalıdır. “Azərbaycan hökumətinin hərəkətini pisləməyənlər AŞ dəyərlərinə hörmət etmir”, - o vurğulayıb.

Macarıstandan olan deputatlar bildiriblər ki, bütün prosedurlara onlar tərəfindən əməl olunub. Onlar əmin idilər ki, avqustun 31-də Azərbaycana verilən R.Səfərov cəzasını öz Vətənində çəkəcək.

Öz növbəsində Azərbaycan üzrə Monitorinq Komitəsinin məruzəçisi Pedro Aqramunt R.Səfərovun azadlığa buraxılmasını pisləyərək eyni zamanda diqqəti Azərbaycan ərazilərinin işğal olunmasına, ölkədə çoxsaylı qaçqının olmasına yönəldib.

Azərbaycanlı deputatıar bildiriblər ki, bu məsələyə ümumilikdə Qarabağ münaqişəsi kontekstində yanaşılmalıdır. Çünki qətlin motivləri məhz bu problemlə sıx bağlıdır. Onlar qeyd ediblər ki, Azərbaycan qətlə görə mühakimə olunmuş şəxsi əfv edən birinci ölkə deyil. 

Onlar Ermənistan tərəfindən qəhrəmanlaşdırılan erməni terrorçuların əfv olunması faktını da göstəriblər. Lakin AŞ bu faktlardan heç birinə reaksiya verməyib.

Erməni deputatlar parlamentariləri “Strasburq konvensiyasının saxtalaşdırılmasında” ittiham ediblər.

Türkiyəli deputat Əhməd Türkeş  diqqəti ASALA erməni təşkilatının terrorçu fəaliyyətinə yönəldib. Təşkilat üzvləri tərəfindən 31 türk diplomat qətlə yetirilib. “Bəlkə indi erməni tərəfi başa düşər ki, həmin qətllər  türk tərəfi üçün necə ağrılı olub”, - Türkeş vurğulayıb. 

İtaliyalı deputat Farina barışdırıcı mövqedən çıxış edib. Onun sözlərinə görə, “elə etmək lazımdır ki, tərəflər bir-birindən üz çevirməsinlər”.

Fransız deputat Sallenin çıxışı daha radikal olub. Belə ki, o, Azərbaycanın AŞ-nin tərkibində qalması məsələsinə yenidən  baxılmasını təklif edib.

Müzakirələrin yekunlarına əsasən deputatlar AŞPA Bürosuna tövsiyə ediblər ki, oktyabrın 5-də keçiriləcək iclasda bu məsələnin Hüquq Məsələləri və İnsan Haqları Komitəsində gələcək müzakirəyə çıxarılıb-çıxarılmamasına dair qəbul etsin.  -04S-