ATƏT nümayəndəsi Əfqan Sadıqovun Gürcüstanda həbs olunmasından narahatdır

Gürcüstan hakimiyyəti jurnalist Əfqan Sadıqovu Azərbaycana ekstradisiya etmədən əvvəl onun işini diqqətlə araşdırmalıdır, - ATƏT-in mətbuat azadlığı üzrə nümayəndəsi Tereza Riberio bildirib.

“Azərbaycanlı redaktor Əfqan Sadıqovun Gürcüstanda mümkün ekstradisiyaya qədər saxlanılması narahatlıq doğurur. Sadıqov öz jurnalist fəaliyyətinə görə əvvəllər Azərbaycanda həbsdə olduğu üçün Gürcüstan onun üzləşə biləcəyi riskləri diqqətlə nəzərdən keçirməlidir. Diqqətli qiymətləndirmə tələb olunur”, - Riberio X sosial platformasında yazıb.

* “Azel” TV saytının təsisçisi Əfqan Sadıqov Azərbaycan Prokurorluğunun sorğusu əsasında avqustun 3-də Tbilisidə saxlanılıb.

Avqustun 4-də məhkəmə onu Azərbaycana ekstradisiya etmək üçün iki ay müddətinə həbs edib. Azərbaycanda ona qarşı hədə-qorxuyla tələb etmə ittihamı ilə cinayət işi açılıb.

Sadıqov ittihamı rədd edir və hesab edir ki, hakimiyyəti tənqid etdiyinə görə cəzalandırmaq məqsədilə cinayət işi saxtalaşdırılıb.

Bundan əvvəl Əfqan Sadıqov Azərbaycanda iki dəfə cinayət məsuliyyətinə cəlb edilib və iki dəfə həbs olunub. Hər ikisində hüquq müdafiəçiləri onu siyasi məhbus kimi tanıyıblar.