Avropa İnsan Hüquqları Məhkəməsi Azərbaycanda QHT-lərin bank hesablarının dondurulmasını qanunsuz sayıb

Bakı/16.02.23/Turan: Fevralın 16-da Avropa İnsan Hüquqları Məhkəməsi Azərbaycandan 21 ərizə üzrə üç qərar və bir qərardad çıxarıb. Bu barədə sözügedən qurumun qərarlarının monitorinqi üzrə qrupun rəhbəri Xalid Ağəliyev bildirib.

"İbrahimbəyov və başqaları Azərbaycana qarşı" işində mərhum kinodramaturq Rüstəm İbrahimbəyov, Şöhrət İbrahimbəyova və Lalə Əfəndiyeva əzizəçi kimi çıxış ediblər.  Onlar Dövlət Neft Şirkətinin (SOCAR) tələbilə torpaq sahəsinə mülkiyyət hüquqlarının ləğvinin qanunsuz olmasına etiraz ediblər.

Avropa İnsan Hüquqları Məhkəməsi hesab edib ki, ərizəçilər torpaq mülkiyyəti hüquqlarını əsaslandırmaq üçün yerli məhkəmələrdə kifayət qədər hüquqi addım atmayıblar.

"Məcidli Azərbaycana qarşı" işində Avropa İnsan Hüquqları Məhkəməsi 2 aprel 2011-ci il tarixində Xalq Cəbhəsi Partiyası üzvünün dinc etiraz aksiyasında iştirakına görə 2 il müddətinə azadlıqdan məhrum edilməsini qanunsuz sayıb və ona 4350 avro məbləğində kompensasiya ödənilməsinə qərar verib.

"Aynur İmranov və başqaları Azərbaycana qarşı" işində Avropa İnsan Hüquqları Məhkəməsi Azərbaycan vətəndaş cəmiyyəti və QHT-lərin 18 fəalının mülkiyyət hüquqlarının pozulmasına, əsasən bank hesablarının əsassız dondurulmasına dair ərizələrini təmin edib.

Avropa İnsan Hüquqları Məhkəməsi bütün ərizəçilərə: Aynurə İmranova, Qubad İbadoğlu, Elçin Abdullayev, İntiqam Əliyev, Ənnağı Hacıbəyli, Emin Hüseynov, Zöhrab İsmayılov, Rəsul Cəfərov, Gülnarə Bağırova, Səadət Mehdiyeva, Ülviyyə Axundova, İqtisadi Araşdırmalar Mərkəzi, Milli və Beynəlxalq Araşdırmalar Mərkəzi, Reportyorların Azadlıq və Təhlükəsizlik İnstitutu, Hüquq Maarifçiliyi Cəmiyyəti, Azərbaycan Hüquqşunaslar Assosiasiyası, Demokratik Təsisatlar və İnsan Haqları Birliyi, Azad İqtisadiyyata Yardım İctimai Birliyinə mənəvi ziyana görə 3 min avro və məhkəmə xərclərini ödəmək üçün 300 avro ödənilməsini qərara alıb.  

Eyni zamanda Avropa İnsan Hüquqları Məhkəməsi Qafqaz Media Araşdırmaları Mərkəzinin şikayətini qəbuledilməz sayıb. 06B