Avropa İttifaqı və Avropa Şurası Azərbaycanda islahatları dəstəkləmək üçün yeni layihələri təqdim edib

Bakı/18.04.23/Turan: Avropa İttifaqının və Avropa Şurasının Bakıdakı missiyaları aprelin 18-də "Yaxşı idarəçilik naminə tərəfdaşlıq" (PGG III) proqramının üçüncü mərhələsi çərçivəsində Azərbaycan üçün 2023-2027-ci illəri əhatə edən birgə layihələri təqdim ediblər.

Proqram çərçivəsində Azərbaycanda Aİ və Avropa Şurasının birgə maliyyələşdirdiyi, ümumi büdcəsi 2,5 milyon avro olan dörd layihə həyata keçiriləcək. Onlar proqramın əvvəlki mərhələlərinin nəticələrinə əsaslanır və iqtisadi cinayətlərin qarşısının alınması və onlara qarşı mübarizə üçün institusional potensialın daha da möhkəmləndirilməsində Azərbaycan hakimiyyətinə kömək etməyə, xüsusən mediasiyanın təşviqi ilə məhkəmə islahatlarını dəstəkləməyə, habelə gender bərabərliyinə şərait yaratmağa və məişət zorakılığına qarşı mübarizəyə yönəlib.

Bundan başqa, regional səviyyədə iqtisadi cinayətlərə qarşı mübarizəyə, bərabərliyin və ayrı-seçkiliyə yol verilməməsinin təşviqinə və qadınların ədalətli mühakiməyə çıxışının asanlaşdırılmasına yönəlmiş üç layihə həyata keçiriləcək.

AŞ Bakı ofisinin rəhbəri Petr Zix bildirib ki, vəsaitin 80%-ni Aİ, 20%-ni AŞ ayıracaq.

"Azərbaycanda həyata keçirilən layihələr yaxşı idarəçilik, korrupsiyaya, qadınlara münasibətdə ayrı-seçkiliyə və gender zorakılığına qarşı mübarizə kimi məsələləri əhatə edəcək", deyə Zix bildirib.

Bundan başqa, onun sözlərinə görə, Azərbaycan qeyd edilən sahələrdə həm də Ukrayna, Ermənistan və Gürcüstan üçün nəzərdə tutulmuş regional layihələrdən faydalanacaq.

Ümumilikdə 4 ölkədə 21 layihə həyata keçiriləcək. 

Aİ-nin Azərbaycandakı nümayəndəliyinin rəhbəri Peter Mixalko deyib ki, qeyd edilən proqramlar "Şərq Tərəfdaşlığı" ölkələrinin qanunvericiliklərinin təkmilləşdirilməsinə və Avropa standartlarına uyğunlaşdırılmasına xidmət edəcək.

"Yeni layihələr ədalətli mühakimənin səmərəliliyinin və keyfiyyətinin artırılmasına, bərabərliyin təşviqinə töhfə verəcək. Yaxşı idarəçiliyə yardım sabitliyə və inkişafa doğru aparır", deyə Mixalqo bildirib.

Azərbaycan 2015-ci ildən etibarən "Yaxşı idarəçilik naminə tərəfdaşlıq" proqramının benefisiarları arasındadır, deyə öz növbəsində, XİN-in insan hüquqları sahəsində beynəlxalq qurumlarla əməkdaşlıq idarəsinin rəisi Aysel Yaqubova bildirib.

Onun fikrincə, bu proqramın həyata keçirilməsi Aİ və AŞ arasında uğurlu əməkdaşlığın nümunəsidir.

"Bu təşəbbüs Azərbaycanda islahatların sürətlənməsinə və tamamlanmasına yönəlib", deyə o qeyd edib. 

Daha sonra tədbir mətbuatın iştirakı olmadan davam edib.

Əvvəllər Avropa qurumlarının bu cür tədbirləri Azərbaycan vətəndaş cəmiyyəti nümayəndələrinin iştirakı ilə müzakirələr şəklində keçirilirdi. 30В