Avropa İttifaqının 12 ölkəsinin xarici işlər nazirləri Gürcüstandakı vəziyyətlə əlaqədar birgə bəyanatla çıxış ediblər

Avropa İttifaqının 12 ölkəsinin xarici işlər nazirləri Gürcüstandakı hadisələrlə bağlı Avropa İttifaqının xarici işlər və təhlükəsizlik siyasəti üzrə ali nümayəndəsi Jozep Borelə, həmçinin Avropa İttifaqının qonşuluq siyasəti və genişlənmə üzrə komissarı Oliver Varhelyiyə müraciət ediblər.

Müraciətdə nazirlər Gürcüstan hökumətinin hərəkətlərini tənqid edirlər və ölkənin Avropaya inteqrasiyasının təhlükə altında olduğunu bildirirlər. Bu barədə "Azadlıq radiosu"nun Gürcüstan xidməti məlumat yayıb.

Nazirlər bildirirlər ki, Gürcüstan hakimiyyəti ölkənin Avropaya inteqrasiyasını təhlükə altına qoyur, "xarici agentlər haqqında Rusiyapərəst qanun isə "Gürcüstanda demokratiyanın və insan hüquqlarının narahatedici şəkildə pisləşməsinin başqa bir əlamətidir".

"Dinc nümayişçilərə və etiraz aksiyasını işıqlandıran jurnalistlərə qarşı güc tətbiqi, əsas hüquq və azadlıqların pozulması  demokratiya və Avropa dəyərlərilə bir araya sığmır. Gürcü Arzusunun fəxri sədri öz çıxışında hökumətin Qərb demokratik prinsiplərindən uzaqlaşmasını gücləndirib.