Avropa Komissiyasının rəhbəri qaz sövdələşməsi üçün Azərbaycana gəlir

Brüssel/18.07.22/Reuters: Avropa Komissiyasının prezidenti Ursula fon der Lyayen daha çox təbii qaz almaq üçün bazar ertəsi Azərbaycana səfər edəcək, belə ki, Avropa İttifaqı Rusiyanın enerji daşıyıcılarından asılılığını azaltmağa çalışır, bu barədə Aİ nümayəndəsi bildirib.

"Rusiyanın öz enerji təchizatını silaha çevirməyə davam etməsi şəraitində enerji daşıyıcıları idxalının şaxələndirilməsi Aİ üçün prioritetdir", bu barədə Avropa Komissiyasının Twitter-də yer alan məlumatında deyilir. "Prezident fon der Lyayen və energetika üzrə komissar Kadri Simson əməkdaşlığı daha da möhkəmləndirmək üçün sabah Azərbaycana səfər edəcək".

Reuter-in iyulun 14-də tanış olduğu sənəd layihəsinə əsasən, Komissiya Aİ ölkələrinə təbii qaz idxalının artırılması üçün sövdələşmə bağlamağı və bunun üçün boru kəmərinin genişləndirilməsini dəstəkləməyi təklif edib.

Komissiyadan şərh almaq mümkün olmayıb. Aİ hökumətləri artıq Rusiyaya qarşı tədrici neft embarqosu haqqında razılıq əldə ediblər.

Bu arada Rusiya qazının Polşadan tranziti bu il dayandırılıb, Ukrayna vasitəsilə qaz tədarükü isə fevralın 24-də Moskvanın Ukraynaya hücumu ilə əlaqədar azaldılıb.

Dünyada iqtisadiyyatının ölçüsünə görə dördüncü ölkə olan Almaniya bütün ssenarilərə, hətta bu həftənin sonunda "Şimal axını-1" qaz kəmərinə 10 günlük adi texniki xidmət dövrü başa çatdıqdan sonra Rusiya qazının tədarükünün tamamilə dayandırılmasına belə hazırlaşır.  

Bazar günü Rusiyanın Vyanada beynəlxalq orqanlar yanında səfiri Mixail Ulyanov Twitter-də belə yazıb: "Rusiya heç vaxt Avropaya təbii qaz tədarükünü davam etdirməkdən imtina etməyib və müqavilə öhdəliklərini tam şəkildə yerinə yetirir".--0--