Avropa Parlamentində Dağlıq Qarabağ qrupu yaradılıb

Oktyabrın 15-də “Ermənistanın avropalı dostları” təşkilatının  (EuFoA) dəstəyi ilə Avropa Parlamentində Dağlıq Qarabağ qrupu təqdim olunub. Qrupun məqsədi vətəndaş cəmiyyətinin inkişafına və demokratik idarəçiliyə, həmçinin Qarabağ ərazisində Avropa dəyərlərinin yayılmasına yardım göstərməkdir. Bu barədə Ermənistan KİV-i məlumat verib.

Qrupa Avropa Demokratik Partiyasının fraksiya üzvü Frank Engel rəhbərlik edir. Qrup Aİ nümayəndələri və Qarabağ erməniləri arasında əlaqələrin qurulmasına, avropalı məmurların bölgəyə səfərlərinin təşkilinə yardım göstərəcək.  

Həmçinin qeyri-rəsmi qrup Qarabağın müxtəlif beynəlxalq qruplarda və Aİ proqramlarında təmsil olunmasında maraqlıdır.

“Bu qrup region haqda təsəvvürləri olan, ona maraq göstərən  və özünü Dağlıq Qarabağ xalqının sərəncamında görmək istəyən insanları birləşdirən orqandır. Biz hələlik onlara tanış olmayan, lakin  sonucda demokratik respublika sayılan region haqda insanlara məlumat vermək istəyirik”, - Panarmenian F.Engeldən sitat gətirir.

“Qrupun yaradılması təbii prosesdir  və müəyyən dərəcədə Aİ institutları tərəfindən qəbul edilən müddəaların yerinə yetirilməsidir. Bu sənədlər Aİ məmurlarının Qarabağa səfərlərini və bütün səviyyələrdə  nümayəndələr ilə görüşlərini stimulaşdırır”, - EuFoA rəhbəri Lorenso Oçoa bildirib.

Xatırladaq ki, rəsmi Bakı onun icazəsi olmadan Dağlıq Qarabağa səfər edən bütün əcnəbiləri “qara siyahı”ya salır. Görünür, tezliklə bu siyahıya yeni adlar əlavə olunacaq.-02D-