Avropa Yenidənqurma və İnkişaf Bankı Xəzər Gəmiçiliyinə 60 milyon dollar kredit verəcək

Bakı/18.02.23/ Turan: Avropa Yenidənqurma və İnkişaf Bankı "Azərbaycan Xəzər Dəniz Gəmiçiliyi" Qapalı Səhmdar Cəmiyyətinə 60 milyon dollar məbləğində uzunmüddətli maliyyələşmə verməyi planlaşdırır və bu məsələyə aprelin 26-da baxacaq, bankın məlumatında deyilir.

"Kredit vəsaitləri “Azərbaycan Xəzər Dəniz Gəmiçiliyi" Qapalı Səhmdar Cəmiyyətinin beynəlxalq ekspansiya strategiyası çərçivəsində gəmilərin alınmasına yönəldiləcək. Bu layihə gəmiçiliyə Xəzər dənizindən kənarda beynəlxalq sularda əməliyyatları genişləndirməyə, regional və ticarət  əlaqələrini yaxşılaşdırmağa kömək edəcək", - məlumatda vurğulanır.

Avropa Yenidənqurma və İnkişaf Bankı hesab edir ki, kredit vəsaitləri “Azərbaycan Xəzər Dəniz Gəmiçiliyi" Qapalı Səhmdar Cəmiyyətinin marşrut istiqamətlərinin, əsasən də Orta dəhliz üzrə, çevikliyinin artırılmasına kömək edəcək ki, bu da nəticədə Qapalı Səhmdar Cəmiyyətinin beynəlxalq əməliyyatlardan gəlirlərinin artmasına gətirib çıxaracaq.

Kredit Qapalı Səhmdar Cəmiyyətinin investisiya proqramının həyata keçirilməsinə kömək edəcək.

Bundan əlavə, o, daha yüksək ekoloji standartlara nail olmaq və karbona keçidlə əlaqədar riskləri aradan qaldırımaq üçün enerji səmərəliliyi və resurs səmərəliliyi sahəsində Avropa Yenidənqurma və İnkişaf Bankının təcrübəsindən istifadəyə imkan verəcək.

Gəmilər MARPOL Konvensiyası daxil olmaqla, ətraf mühitin və təhlükəsizliyin mühafizəsi üzrə beynəlxalq tələblərə və  çirkab sularının axıdılması, su ballastının idarə edilməsi, neft dağılmaları ilə bağlı gözlənilməz hallara dair IMO-nun tələblərinə cavab verəcək.

“Azərbaycan Xəzər Dəniz Gəmiçiliyi" Qapalı Səhmdar Cəmiyyətinin layihəni Avropa Yenidənqurma və İnkişaf Bankının effektivlik tələblərinə uyğun  həyata keçirmə qabiliyyəti vacibdir, həmçinin korporativ ekoloji, sosial idarəetmə sistemlərinin və cari əməliyyatların icmalı olacaq", - Avropa Yenidənqurma və İnkişaf Bankı bildirib.

Maliyyələşmə  Avropa Yenidənqurma və İnkişaf Bankının Green, E&S və Xüsusi Səhmdarlar Fondundan (SSF) Climate Transition Due Diligence (bütün layihənin 85 faizi) sxemi ilə təmin ediləcək.

1992-ci ildən Azərbaycan Avropa Yenidənqurma və İnkişaf Bankının üzvüdür və bu müddətdə bankdan 187 layihənin maliyyələşdirilməsi üçün 3,6 milyard avroya yaxın vəsait alıb.

2023-cü ilin əvvəlinə bankın Azərbaycandakı cari portfeli 35 layihə üzrə 843 milyon avro təşkil edir: 86 faiz infrastruktur, 10 faiz sənaye və aqrar-sənaye kompleksi, 4 faiz maliyyə sektorunun payına düşür.

2023-cü ildə Avropa Yenidənqurma və İnkişaf Bankı Azərbaycanda layihələrə 300 milyon dollara qədər kredit resursu təqdim etməyi planlaşdırır. - 0—