AXC xalqı azadlığına qovuşdurdu

Azərbaycan Klassik Xalq Cəbhəsi Partiyası (KXCP) Azərbaycan Xalq Cəbhəsinin (AXC) yaradılmasının 25 illik yubileyilə bağlı təbrik məktubu yayıb.

Müəlliflər xalqı bu yubiley münasibətilə təbrik edərək AXC-ni Azərbaycanı rus imperiyasından qurtuluşun xilaskarı, xalqın istiqlala qovuşdurucusu, dövlətçiliyin bərpaçısı kimi dəyərləndirir.  

AXC həm də Azərbaycan xalqının məhv edilmiş dövlətçiliyinin çağdaş dəyərlərə uyğun yenidən bərpa etməsi  kimi dəyərləndirib, “Bir kərə yüksələn bayrağın bir daha enməyəcəyi” fəlsəfəsini gənclərə aşılandıran qüvvə adlandırıb.

Daha sonra sənəddə azadlıq mübarizəsinin lideri Əbülfəz Elçibəyin rəhbərliyi altında AXC-nin Azərbaycanda 1992-ci ildə ilk dəfə demokratik seçkilər keçirməsinə, ölkədə demokratik institutların yaradılması, milli ordu quruculuğuna başlanması, milli valyutanın tətbiqi, Qərbə interqasiya kimi və s. islahatların həyata keçirilməsinə işarə edilir.

“XX əsrin əvvəlində Azərbaycan xalqının əldə etdiyi azadlıq və istiqlalın XX əsrin sonunda yenidən və əbədi olaraq bərpasında AXC misilsiz rol oynadı. AXC-nin  yaranmasından 25 il keçsə də varisləri, əsas istiqlalçı qüvvələr olaraq vətənimizin bütövləşməsi, demokratik cəmiyyətin qurulması uğrunda; avtoritarizmə, monarxiyaya, korrupsiyaya, saxtakarlığa, qanunsuzluğa qarşı mücadiləyə öncüllük edirlər.

Biz bütöv, demokratik, müstəqil, qüdrətli Azərbaycan dövlətçiliyinin qurulmasını əsas məqsədi elan etmiş AXC ideyaların qalib gələcəyinə inanırıq”,-müraciətdə deyilir.-05D-