Azərbaycan Baş Prokurorluğu erməni həmkarlarını hərbi cinayətləri araşdırmağa çağırıb

Bakı/28.12.20 / Turan: Azərbaycan Baş Prokurorluğu İkinci Qarabağ Müharibəsi zamanı həlak olmuş hərbi qulluqçuların və dinc sakinlərin cəsədlərinin azərbaycanlı və erməni hərbi qulluqçular tərəfindən təhqir olunması faktlarını araşdırmaqda davam edir. Bu barədə Azərbaycan Baş Prokurorluğu mətbuat xidmətinin dekabrın 28-də yaydığı məlumatda deyilir.

Faktlar üzrə əsirlərin öldürülməsilə bağlı hər bir fakt üzrə cinayət işləri başlanılıb. Buna baxmayaraq, Ermənistan  erməni tərəfdən törədilmiş cinayətlərə dair araşdırmalar aparmır.

“Azərbaycan Respublikası Baş Prokurorluğu döyüş əməliyyatları zamanı həlak olmuş Azərbaycan hərbi qulluqularının  meyitləri üzərində təhqiredici hərəkətlər, əsir düşmüş azərbaycanlı hərbçilər ilə qeyri-insanı rəftarı əks etdirən videögörüntülər, mülki Azərbaycan vətəndaşlarının öldürülməsi və onlara xəsarət yetirilməsi faktları ilə bağlı Ermənistan hüquq- mühafizə orqanları tərəfindən  tədbir görülməsi, üzərinə düşən beynəlxalq öhdəliklərin yerinə yetirilməsi, cinayət faktları üzrə açıq və ədalətli araşdırma aparılması üçün beynəlxalq təşkilatlara müraciət edib”, -məlumatda deyilir.

 Hazırda Azərbaycan hərbi qulluqularına qarşı qanuna zidd hərəkətlər, 101 mülki Azərbaycan vətəndaşının öldürülməsi, 423 nəfərə xəsarət yetirilməsi ilə bağlı  bütün cinayət işləri üzrə Azərbaycan Respublikasının prokurorluq orqanları tərəfindən zəruri və intensiv istintaq hərəkətləri aparılır.

Baş Prokurorluq bir daha bəyan edir ki, təqsirli şəxslərin müəyyən edilərək mövcud hüquqi mexanizm və beynəlxalq hüquq normaları çərçivəsində məsuliyyətə cəlb edilməsindən ötrü mümkün olan bütün tədbirlərin görülməsi təmin edilməklə bundan sonra da ictimaiyyətə geniş məlumat verilməsi təmin ediləcək.-02D-