Azərbaycan bəzi ərzaq məhsullarının ixracına məhdudiyyət tətbiq edir

Bakı/19.03.22/Turan:  Azərbaycan hökuməti bəzi ərzaq məhsullarının ölkədən çıxarılmasına məhdudiyyətlər qoyub.

Əsasən dənli bitkilərin, ət və ət məhsullarının, süd və süd məhsullarının, kərə yağı və bitki yağlarının, şəkər və şəkər istehsalı üçün xammalın və digər ərzaq məhsullarının Azərbaycanın gömrük ərazisindən çıxarılması bu il dekabrın 31-dək tənzimlənəcək.

Bu barədə Nazirlər Kabinetinin martın 18-də qəbul etdiyi “Minimum istehlak səbətinin tərkibinə daxil olan bir sıra əsas ərzaq mallarının və onların istehsalında istifadə olunan malların ölkə ərazisindən aparılmasının tənzimlənməsinə dair tədbirlər haqqında” qərarında deyilir.

Sənədə əsasən, həmin malların gömrük ərazisindən çıxarılması ölkədə mövcud olan ehtiyatlar nəzərə alınmaqla İqtisadiyyat Nazirliyinin müsbət rəyi əsasında həyata keçiriləcək.

Bu qərar "son hadisələrin Azərbaycanın əsas ərzaq məhsulları ilə təchizatına və ölkənin ərzaq təhlükəsizliyinə mümkün mənfi təsirinin qarşısının alınmasına yönəlib".

“İqlim dəyişiklikləri və son dövrlər baş verən geosiyasi proseslər səbəbindən dünya bazarlarında əsas ərzaq mallarının qiymətlərində davamlı artım qeydə alınır, habelə qonşu ölkələrin bazarlarında həmin malların logistika-təchizat zəncirində problemlər yaranır“, - Nazirlər Kabinetinin qərarında deyilir.–03В06-