Azərbaycan demokratik qüvvələri SOS siqnalı verir

Azərbaycanın yüzə yaxın vətəndaş cəmiyyəti nümayəndəsi, siyasətçisi və jurnalisti birgə bəyanat yayaraq, Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmədlinin həbsini pisləyiblər.

Onlar Məmmədlinin həbsini vətəndaş cəmiyyətindən qisas alan hakimiyyətin genişmiqyaslı kampaniyasının tərkib hissəsi kimi qiymətləndirirlər.

Müraciət müəllifləri əmindirlər ki, Məmmədli seçkilərin monitorinqi üzrə layihələr həyata keçirdiyinə görə cinayət təqibinə məruz qalır.

2011-ci ildə Belarus rejimi tanınmış hüquq müdafiəçisi Ales Bialiatskini eyni üsul və ittihamla həbs edib və buna görə rəsmi Minsk ciddi beynəlxalq qınaq və təzyiqlərə məruz qalıb.

Bəyanatda həmçinin xatırladılır ki, Məmmədli ilə yanaşı istintaq orqanları Seçkilərin Monitorinqi və Demokratiyanın Tədrisi Mərkəzinin (SMDT) icraçı direktoru olan Bəşir Süleymanlı və eləcə də, SMDT ilə son layihədə partnyor təşkilatı olan Könüllülərin Beynəlxalq Əməkdaşlığı İctimai birliyinin sədri Elnur Məmmədovu eyni cinayət işi üzrə təqsirləndirilən şəxs qismində tanıyıb və barələrində başqa yerə getməmək haqqında iltizam qətimkan tədbiri seçiblər.

Bundan başqa, dünən Prezident Administrasiyasından təklif edilən, son 5 ildə QHT-lərin fəaliyyətini tənzimləyən qanunvericiliyə edilmiş, vətəndaş cəmiyyəti üçün ciddi maneələr yaradan çoxsaylı mürtəce dəyişikliklərin davamı olan düzəlişlər parlament tərəfindən qəbul olunub.

Beynəlxalq QHT-lərin Azərbaycandakı bölmələri də hakimiyyətin hədəfinə çevrilib. Belə ki, İnsan Haqları Evi, Milli Demokratiya İnstitutunun fəaliyyəti iflic halına salınıb, digər bir neçə təşkilatda yoxlamalar başlayıb. Bu repressiyaların məqsədi Azərbaycanda tənqidi səsləri susdurmaqdır.

Dünya və ölkə mediasında dərc olunan araşdırmalar sübut edir ki, Azərbaycan iqtisadiyyatı ən yüksək çinli məmurların və onların ailə üzvlərinin inhisarına verilib, büdcə vəsaitləri bir qrup oliqarxın ciblərinə axıdılır. Beynəlxalq anti-korrupsiya təşkilatları və jurnalistlər Azərbaycanın milli sərvətlərinin işlədilməsində və mədən sənayesində də böyük gəlirli kontraktların ölkə rəhbərliyində olan şəxslərin yaxın qohumlarına verildiyini üzə çıxarıb.

Eyni zamanda sübut olunub ki, son 10 ildə müxtəlif kölgəli sxemlərlə Azərbaycandan ofşor zonalara milyardlarla dollar vəsait çıxarılıb. Yüksək rütbəli məmurların ailə üzvləri ofşor zonalarda təsis etdikləri şirkətlər vasitəsi ilə sonradan Azərbaycanda iqtisadiyyatın ən gəlirli sənaye müəssisələrini alaraq qanunsuz sahibkarlıq fəaliyyəti ilə məşğul olurlar. Lakin hakimiyyət bu müəssisələrin qanunsuz fəaliyyətinə və dövlət büdcəsindən vergi yayındırmalarına göz yumur. 

Bu fonda Anar Məmmədliyə qarşı vergi ödənişindən yayınma ittihamı irəli sürülür.

Maraqlıdır ki, həbs Azərbaycan iqtisadiyyatı üçün önəmli olan Şahdəniz-2 investisiya sazişinin imzalanma mərasimindən bir gün öncə baş verib. İmzalanma günündə isə QHT fəaliyyətini məhdudlaşdıran qanun dəyişiklərin qəbuluna start verilib.

“Hesab edirik ki, bununla da Azərbaycan hakimiyyəti Qərbə mesaj verir ki, biz enerji sahəsində Avropa Birliyi ilə yeni strateji müqavilə imzalayırıq, amma Avropa İnsan haqları dəyərləri Azərbaycan iqtidarına lazım deyil”, deyə bəyanatda qeyd edilir.

Hakimiyyət həmçinin ölkədə informasiya azadlığını məhdudlaşdırır. İllərdir ki, qanunlar tələb etsə də, heç bir məmur, nə də onların ailə üzvləri dövlət qurumlarına və ictimaiyyətə maliyyə bəyannamələrini təqdim etmirlər. İş o həddə çatıb ki, 3-cü müddət üçün seçkilərdə iştirak edən namizəd və indiki prezident İlham Əliyevin Mərkəzi Seçki Komissiyasına təqdim etdiyi gəlir bəyannaməsi Azərbaycan xalqından nümayişkaranə şəkildə gizli saxlanılıb.

Özlərinə rüşvət və korrupsiya üçün münbit şərait yaradan Azərbaycan yüksək çinli məmurları eyni zamanda ölkədə qanun aliliyini tapdalayaraq vətəndaşların mülkiyyət hüquqlarını pozurlar. Azərbaycan Konstitusiyasında və Avropa insan Haqları Konvensiyasında əks olunmuş 3 fundamental prinsip - ifadə, sərbəst toplaşmaq və birləşmək azadlığı faktiki olaraq məhv olmaq ərəfəsindədir.

Müraciət müəllifləri hakimiyyətdən bütün siyasi məhbusların, o cümlədən Anar Məmmədlinin azad edilməsini tələb edirlər.

Müəlliflər hesab edirlər ki, 2014-cü ilin may ayında AŞ Nazirlər Komitəsində sədrliyə başlaması ərəfəsində Azərbaycan insan hüquqlarına hörmət nümayiş etdirməlidir. Onlar Avropa Şurası Nazirlər Kabinetini, Avropa Şurası Parlament Assambleyasının Baş katibini, Avropa Şurasının İnsan haqları üzrə komissarını, Avropa Şurası Parlament Assambleyasının üzvlərini və Avropa Şurasının digər aidiyyatı qurumlarını Azərbaycanda insan haqları sahəsində yaranmış dözülməz şəraitə münasibət bildirməyə çağırırlar.

“Biz Avropa Şurasının bütün maraqlı tərəflərini Azərbaycan hakimiyyətinə çağırış etməyə və insan haqları sahəsində öhdəliklər yerinə yetirilməzsə zəruri sanksiyalar tətbiq etməyə çağırırıq”, deyə bəyanatda vurğulanır.

Eyni zamanda, sənəddə Avropa Şurasının Parlament Assambleyasını yanvar sessiyası zamanı Azərbaycan nümayəndə heyəti təsdiq olunmamışdan qabaq, Azərbaycan hökumətindən insan haqlarına qarşı başlamış repressiyaları dayandırmağı və bu repressiyaların qurbanlarını azad etməyi tələb etməyə çağırış yer alır.

Onlar həmçinin BMT, ATƏT, Avropa Birliyini bu acınacaqlı durumda Azərbaycan vətəndaş cəmiyyəti fəallarına əllərindən gələn köməklikləri göstərməklərini xahiş edirlər. -06D-