Azərbaycan Güləş Federasiyası Frank Çamizonun ittihamlarını rədd edib

Azərbaycan Güləş Federasiyası Bakıda keçirilən Avropa Olimpiya təsnifat turnirinin yekunları ilə bağlı italiyalı güləşçi Frank Çamizonun ittihamlarını rədd edən bəyanatla çıxış edib.

Qeyd edək ki, Olimpiya Oyunlarına lisenziyaların oynanıldığı bu yarışlarda Çamizo 74 kiloqram çəki dərəcəsində final görüşündə azərbaycanlı güləşçi Turan Bayramova məğlub olub. Lakin Çamizo və onun  məşqçiləri hakimlərin qərarından narazılıqlarını bildiriblər. Belə ki, yarışın sonunda hakimlər güləş vaxtının bitdiyini qeyd edərək onun güləşməsini saymayıblar.

«Məğlubiyyətlə barışmayan Çamizo ağır ittiham irəli sürüb. Heç bir dəlil-sübut olmadan guya bu görüşdə məğlub olması üçün ona 300 min dollar rüşvət təklif edildiyini bildirib”, - Azərbaycan Güləş Federasiyası qeyd edib.

Məlumatda deyilir ki, UWW bu görüşün hakim idarəçiliyini araşdırmağa başlayıb və yaxın günlərdə müvafiq qərar veriləcək. Eyni zamanda, Çamizo “Duty to report” qaydalarına əsasən, belə bir rüşvət təklifinin olmasıyla əlaqədar dərhal etiraz protokolunda öz qeydlərini etməliydi. İndi ya o öz iddiasını sübuta yetirməli, ya da bu iddianın əsassız olduğunu bildirməlidir.

“Azərbaycan Güləş Federasiyası hər zaman “Fair Play” ədalətli oyun prinsiplərinə sadiqdir. Biz Çamizonun bu ittihamına qarşı hüquqi addımlar atacaq və Dünya Güləş Birliyinə rəsmi qaydada müraciət edəcəyik”, - Azərbaycan Güləş Federasiyasının məlumatında deyilir.

Qeyd edək ki, aprelin 5-7-də keçirilən lisenziya turnirində Azərbaycan idmançıları Parisdə keçiriləcək sərbəst güləş üzrə Olimpiada-2024-ə 6 vəsiqənin hamısını qazanıblar.