Azərbaycan hərbçiləri Türkiyədə keçiriləcək hərbi təlimlərdə iştirak edəcəklər

Bakı/21.05.21/Turan: Mayın 24-də Türkiyənin Konya şəhərində başlayacaq “Anatolian Phoenix-2021” beynəlxalq axtarış-xilasetmə təlimində Azərbaycan hərbçiləri də iştirak edəcəklər.

Azərbaycan Müdafiə Nazirliyinin məlumatına görə, müxtəlif ölkələrin hərbçilərinin iştirakı ilə keçiriləcək təlimlərdə Azərbaycan Hərbi Hava və Hərbi Dəniz Qüvvələrinin hərbi qulluqçuları ilə təmsil olunacaq.

Təlim iyunun 4-dək davam edəcək.

Azərbaycan ordusu bu il Türkiyə ordusu ilə birgə bir neçə təlim keçirib.

Belə ki, fevralın 1-dən 12-dək Türkiyənin Qars vilayətində Türkiyə və Azərbaycan Silahlı Qüvvələrinin “Qış-2021” birgə hərbi təlimləri olub.

Martın 27-də Azərbaycan və Türkiyə ordusunun “Terrorçu ilə mübarizə hərəkətlərinin tətbiqi və hava hücumu” birgə təlimləri keçirilib.

Aprelin 6-dan 8-dək Azərbaycan və Türkiyə hərbi qulluqçularının iştirakı ilə rabitə qoşunlarının birgə taktiki-xüsusi təlimləri keçirilib.-03-