Azərbaycan, İran və RF Şimal-Cənub dəhlizinin inkişafı üzrə səyləri artırmaq niyyətindədirlər (YENİLƏNİB)

Aprelin 7-də Azərbaycan, Rusiya və İran XİN rəhbərləri - Elmar Məmmədyarov, Sergey Lavrov və Məhəmməd Zərifin Bakıda keçirilən üçtərəfli görüşündə əsas mövzu Şimal-Cənub nəqliyyat dəhlizinin inkişafı məsələləri olub.

Danışıqlardan sonra Məmmədyarovun brifinqdə verdiyi məlumata görə, bu məsələ üzrə üçtərəfli əməkdaşlıq ideyası bu ilin əvvəllərində Azərbaycan prezidentinin İrana səfəri zamanı müzakirə olunub. Bundan sonra Azərbaycan prezidenti bu məsələni telefonla RF prezidenti Vladimir Putinlə müzakirə edib.

Daha sonra əməkdaşlığın prioritetlərinin müəyyən olunması üçün XİN rəhbərləri səviyyəsində üçtərəfli görüş keçirmək qərara alınıb.

Məmmədyarov üç ölkə arasında dəmiryolu əlaqələrinin inkişafı üzrə razılaşmalar barədə məlumat verib. Əvvəllər RF-dən Cənubi Qafqaz vasitəsilə İranın Fars körfəzi sahilindəki Bender-Abbas məntəqəsinə birbaşa beynəlxalq dəmiryolu əlaqəsi var idi. Lakin Qarabağ münaqişəsi və Azərbaycan ərazilərinin işğalı ilə əlaqədar Naxçıvandan keçən dəmiryolu əlaqəsi kəsilib.

Hazırda Xəzərin qərb sahilindən Şimal-Cənub dəmiryolu dəhlizinin inkişafı nəzərdə tutulur. Aprelin 20-də artıq Azərbaycan və İran sərhədində 8 km uzunluğunda Astara-Astara dəmiryolu hissəsinin tikintisinə başlanılacaq. Tikinti bu ilin sonuna qədər başa çatacaq, deyə o bildirib.

Öz növbəsində, İran naziri bildirib ki, Tehran Rəşt-Astara dəmir yolunun tikintisi üzərində işi sürətləndirəcək. Bu layihələrin həyata keçirilməsi üç ölkə arasında dəmiryolu əlaqəsini təmin edəcək. İran nazirinin fikrincə, bu, Asiyadan Rusiya və Avropaya yük nəqli üzrə ən səmərəli marşrutdur.

Zərif həmçinin bildirib ki, nazirlər prezientlər səviyyəsində üçtərəfli görüş hazırlayacaqlar.

Lavrov bildirib ki, nəqliyyat nazirliklərinin və digər idarələrin xətti ilə təkcə dəmir yolu deyil, avtomobil və dəniz yolu da daxil olmaqla, Şimal-Cənub layihəsinin inkişafının texniki, ticari və digər aspektləri işlənib hazırlanacaq.

Həmçinin vahid tariflərin müəyyən edilməsi, gömrük prosedurlarının sadələşdirilməsi nəzərdə tutulur.

RF XİN rəhbəri təhlükəsizlik sahəsində qarşılıqlı fəaliyyət, terrorizmə, qanunsuz narkotik dövriyyəsinə, döyüşçülərin sərhədləri keçməsinə qarşı mübarizə üçün üçtərəfli formatın əhəmiyyətini vurğulayıb.

Onun sözlərinə görə, xüsusi xidmətlər və digər orqanlar arasında ikitərəfli əməkdaşlıq artıq uğurla inkişaf edir. “Üçtərəfli format yalnız bizim səylərimizə dəyər qazandıracaq”, deyə Lavrov bildirib. -06C-

2016 Aprel 07 (Cümə axşamı) 13:00:24

Cümə axşamı səhər Bakıda Azərbaycan, İran və Rusiya XİN rəhbərlərinin üçtərəfli görüşü başlayıb.

Elmar Məmmədyarov, Məhəmməd Cavad Zərif və Sergey Lavrov görüşə işçi səhər yeməyi formatında başlayıblar. Nazirlər görüşün yekunları ilə bağlı mətbuat konfransı keçirəcəklər.

Regional əməkdaşlığın möhkəmləndirilməsi üçün yeni format kimi üçtərəfli görüş bir neçə ay öncə planlaşdırılmışdı. Lakin Dağlıq Qarabağda vəziyyət kəskinləşdikdən sonra məlum oldu ki, danışıqların əsas mövzusu bu regionda vəziyyət olacaq.

Görüşdən öncə S.Lavrov prezident İlham Əliyevlə görüşüb. Görüş zamanı tərəflər problemin siyasi yolla həllinə sadiq olduqlarını bəyan ediblər, RİA-Novosti bildirib.

Öz növbəsində Azərbaycan XİN rəhbəri Elmar Məmmədyarov görüşü açaraq deyib ki, əsas mövzu üç ölkənin ərazisilə nəqliyyat dəhlizinin, ilk növbədə İran, Azərbaycan və Rusiyanın kommunikasiyasını  birləşdirən dəmir yolunun yaradılmasıdır. O qeyd edib ki, aprelin 20-də Azərbaycan və İran arasında sərhəddə dəmir yolu körpüsünün inşasına başlanması mərasimi olacaq.-02D-