Azərbaycan Müdafiə Nazirliyi: Cinayətkar Ermənistan rəhbərliyinin özüdür

Azərbaycan Müdafiə Nazirliyinin mətbuat xidməti Azərbaycan ordusunun kəşfiyyat-təxribat qruplarına əraziyə yaxşı bələd olan cinayətkar elementləri cəlb etməklə müxtəlif diversiyalar həyata keçirməsi ilə bağlı Ermənistanın müdafiə naziri Seyran Ohanyanın bəyanatını təkzib edib.

Müdafiə Nazirliyi bildirir ki,  bu fikirlərin heç bir əsası yoxdur. İşğal olunmuş ərazilər suveren Azərbaycanın torpaqlarıdır, azərbaycanlıların həmin ərazilərə keçməsinə və orada sərbəst hərəkət etməsinə qadağa qoyula bilməz. Erməni tərəfinin iddia etdiyi kimi, bu şəxslər heç bir dövlət sərhəddini  pozmayıblar. Çünki işğal nəticəsində, qeyri-qanuni yolla "qurulmuş" qondarma rejimin nəzarətindəki torpaqlar BMT tərəfindən tanınan Azərbaycan Respublikasının ərazisidir.

“Azərbaycan Respublikasına təcavüz aktı törədən, vətəndaşlarına qarşı divan tutulması siyasətini yürüdən, Xocalı soyqırımının törədilməsində iştirak edən Ermənistanın cinayətkar rəhbərliyi, o cümlədən Seyran Ohanyan yaxın vaxtlarda ədalət məhkəməsi qarşısına çıxarılacaq və onların əməllərinə beynəlxalq hüquqi-siyasi qiymət veriləcək”, - məlumatda deyilir.

Həmçinin qeyd olunur ki, Azərbaycan Silahlı Qüvvələri mülki şəxsləri, qeyri-peşəkarları cəlb etmədən istənilən döyüş tapşırığını və əməliyyatı yerinə yetirmək üçün bütün imkanlara malikdir. -02D-