Azərbaycan sabitdir - İ.Əliyev

Bakı/11.01.18/Turan: Sabitlik Azərbaycan hökumətinin əsas prioritetidir. Bu fikri dövlət başçısı İlham Əliyev çərşənbə günü 2017-ci ilin yekunlarına həsr olunmuş iclasda bildirib.

O, sabitliyi ölkənin iqtisadi uğurlarının əsas şərti adlandırıb.

İxracın, turizm dövriyyəsinin artması, qeyri-neft sektorunun inkişafı ölkə rəhbərliyinin siyasətinin doğru olduğunu göstərir, deyə Əliyev bildirib.

Siyasi məsələlərə toxunan prezident Azərbaycanın Qarabağ problemi və problemin ərazi bütövlüyü çərçivəsində həlli üzrə mövqeyinin dəyişmədiyini qeyd edib.

"Dağlıq Qarabağ bizim tarixi torpağımızdır. Həmişə belə olub, bu gün də belədir, sabah da belə olacaq, Dağlıq Qarabağ probleminin həlli yalnız ölkəmizin ərazi bütövlüyü çərçivəsində mümkündür. Bunun başqa yolu yoxdur", deyə o bildirib.

Azərbaycan hərbi gücünü artıracaq. Hərbi şəhərlərin, hərbi bazaların və hərbi hissələrin 80%-i arıtq beynəlxalq standartlara cavab verir. Azərbaycan ordusu bundan sonra da güclənməyə davam edəcək.

Əliyev islam dünyası ilə həmrəyliyin gücləndirilməsini və çoxmədəniyyətliliyin təbliğini mühüm vəzifə kimi qeyd edib.

Uğurlu iqtisadi siyasət Azərbaycanın müstəqil xarici siyasət yürütməsinə imkan verir, deyə Əliyev bildirib.

Əvvəlki müşavirələrdən fərqli olaraq, Əliyev Qərb dairələrini və yerli müxalifəti bu sabitliyi pozmaq cəhdlərinə görə tənqid etməyib. -02D-