2018-ci ildə Azərbaycan bir sıra genişmiqyaslı enerji layihələrini işə salacaq

Bakı/11.01.17/Turan: Neft hasilatının azalmasına baxmayaraq, 2017-ci ildə "Azəri-Çıraq-Günəşli" layihəsi çərçivəsində Azərbaycan dövlətinin gəliri 1,2 mlrd. dollardan artıq olub. Bu barədə Turan agentliyinin Çətin Sual verilişinə müsahibəsində Caspian Barrel Neft Araşdırmaları Mərkəzinin rəhbəri İlham Şaban bildirib.

Onun sözlərinə görə, neft hasilatının düşməsi qış aylarında baş verib, amma bu, Azərbaycan tərəfə daha çox qaz verilməsi ilə müşaiyət olunub.

Qaz gəlirləri neft hasilatının düşməsindən itkini qarşılayıb və hətta əlavə gəlir gətirib.

Şaban qeyd edib ki, 2018-ci ildə həm Azərbaycanda, həm də xaricdə həyata keçirilən bir sıra obyektlərin istismara verilməsi planlaşdırılır.

Bu, əsasən qaz layihələridir. Belə ki, ilk növbədə Cənub Qaz Dəhlizi istismara veriləcək.

Xüsusən, 2018-ci ilin ortalarında "Şahdəniz-2" yatağında qurğular işə salınacaq.

Daha sonra Cənub Qaz Dəhlizinin genişləndirilməsi yekunlaşacaq və nəhayət, TANAP (Transanadolu qaz kəməri) işə salınacaq.

Bundan başqa, 2018-ci ildə Azərbaycanın Türkiyədə ən böyük investisiya layihələrindən biri - "Star" neft emalı zavodu işə salınacaq.

Ölkə daxilində də genişmiqyaslı layihələr təhvil veriləcək. Xüsusən, Sumqayıtda "SOCAR-Karbamid" zavodunun aşılması planlaşdırılır.

"SOCAR-Polimer layihəsi çərçivəsində daha iki layihə təhvil veriləcək. Bu layihələr 2019-cu ildə tam gücü ilə işləyəcək.

Onlar dövlət neft şirkətinin ənənəvi biznesdən kənar əlavə gəlirlər əldə etməsinə imkan verəcək.

Azərbaycanın energetika resurslarının tranzitindən gəlirləri də artacaq.

Hələ 2010-cu ildə Bakı-Tbilisi-Ceyhan boru kəməri ilə Xəzərin şərq sahilində çıxarılan neftin tranziti başlayıb (Söhbət Qazaxıstan və Türkmənistandan gedir).

2017-ci ilin 11 ayı ərzində Bakı-Tbilisi-Ceyhan boru kəməri ilə 5 mln. tondan çox neft nəql edilib. Bu həcm artırılacaq, belə ki, Azərbaycanda hasilat azalacaq, məsələn, Qazaxıstanda isə 2035-ci ilə qədər artacaq.

Uzaq gələcəkdə Azərbaycandan qaz tranziti üçün də imkanlar var.

Gündəlikdə həmçinin Azərbaycan ərazisindən elektrik enerjisi tranziti də var. Xüsusən, RF-dən İranın şimal əyalətlərinə elektrik enerjisi tranziti nəzərdə tutulur.

Bundan başqa, neft-kimya sənayesi də inkişaf edir. Gələn onilliyin ortalarına qədər bu sahə ildə 1 mlrd. dollar gətirəcək, baxmayaraq ki, əvvəllər neft-kimya sənayesinin gəlirləri 70-100 mln. dollar təşkil edirdi.

Bu sahə nəinki ixraca meyllidir, həm də daxili bazar üçün cəzbedicidir.

Azərbaycanda istismara verilən neft-kimya parkı çox səmərəli sənaye-investisiya layihəsidir.

Onun Azərbaycan bazarına bir çox təsirləri olacaq. -06D-