Azərbaycan və Aİ arasında yeni saziş üzrə danışıqlarda fikir ayrılıqları var

Bakı/03.09.18/Turan: Azərbaycan və Aİ arasında tərəfdaşlıq haqqında yeni sazişin imzalanması haqqında intensiv danışıqlar aparılır. Məsləhətləşmələr konstruktiv şəraitdə keçir. Bu barədə Azərbaycan XİN-in rəsmi nümayəndəsi Hikmət Hacıyev bildirib.

Onun sözlərinə görə, "strateji tərəfdaşlıq" haqqında yeni saziş Azərbaycanın Aİ ilə münasibətlərinin vahid çərçivədə ikitərəfli inkişafı üçün hüquqi baza yaradacaq.

Müxtəlif məsələlərdə baxışlarda fərqlər ola biləcəyini deyən Hacıyev bu məqamların konstruktiv şəraitdə müzakirə olunduğunu qeyd edib.

Sənəd siyasət, ticarət, iqtisadiyyat, təhlükəsizlik məsələlərini, humanitar sahəni əhatə edən bir neçə hissədən ibarətdir. Ticari əməkdaşlıq məsələsi açıq məsələlərdən biri olaraq qalır. Bunun səbəbi Azərbaycanın ÜTT-ə üzv olmamasıdır. Tariflər, subsidiyalarla bağlı məqamlar var, onlar əlavə müzakirə predmetidir və bu istiqamətdə iş ekspertlər səviyyəsində davam edir.

Hacıyev istənilən sənədin hazırlanması prosesində fikir ayrılıqları olmasını normal hesab edir, diplomatiya da müzakirələr vasitəsilə həll yollarını axtarmağa xidmət edir.

"Əsas odur ki, Azərbaycanın Aİ ilə münasibətlərini inkişaf etdirmək, onları keyfiyyətcə yeni səviyyəyə qaldırmaq üçün ən yüksək səviyyədə siyasi iradə var", deyə Hacıyev qeyd edib. O, sazişin nə vaxt imzalanacağını deməyə çətinlik çəkib, amma tərəflərin qətiyyəti və siyasi iradəsi sənədin imzalanacağını düşünmək üçün əsas verir, deyə Hacıyev bildirib.

Xatırladaq ki, Azərbaycan və Aİ arasında yeni tərəfdaşlıq sazişi üzrə danışıqlara 2017-ci ilin fevralında start verilib. -05D06-