Azərbaycan və Ermənistan prezidentlərinin görüşünün bazar ertəsi axşam saatlarında keçiriləcəyi gözlənilir

Vyanada ATƏT-in Minsk Qrupunun həmsədri olan ölkələrin XİN rəhbərlərinin vasitəçiliyi ilə Azərbaycan və Ermənistan prezidentlərinin görüşünün bazar ertəsi axşam keçiriləcəyi gözlənilir. Bu, Avropa İttifaqının nümayəndəsi Federika Mogerininin bəyanatlarından və Rusiya və Amerika KİV-lərinin günün birinci yarısında Sergey Lavrov və Con Kerri arasında keçirilən görüş haqqındakı məlumatlardan aydın olur. Onlar Suriya problemini və ondan irəli gələn məsələləri müzakirə edəcəklər, daha sonra Ermənistan-Azərbaycan münaqişəsi üzrə mövqelərini dəqiqləşdirəcəklər.

Axşam Lavrov, Kerri və Fransa XİN rəhbəri Jan-Mark Eyro Azərbaycan və Ermənistan prezidentləri ilə xüsusi görüş keçirəcəklər.

Rəsmi Bakı hələlik hər-hansı şərh yaymayıb. Hətta İlham Əliyevin Vyanaya gedib-getmədiyi açıqlanmır, baxmayaraq ki, Ermənistan rəhbəri səhərdən oradadır.

Müşahidəçilərin fikrincə, əsas danışıqlar qapalı qapılar arxasında keçiriləcək, burada nizamlanmanın mərhələli variantının tətbiqi məsələsi, habelə Qarabağın statusunun müəyyən edilməsinin mümkün yolları müzakirə olunacaq.

Qarabağda hadisələrin necə inkişaf edəcəyi əsasən bugünki görüşün nəticələrindən asılı olacaq. Ekspertlər Yerevanın nizamlanmanın Qarabağ ətrafında ən az 5 rayonun azad edilməsini nəzərdə tutan mərhələli variantına razılaşacağı ehtimalının az olduğunu hesab edirlər. Və Vyanada Sarkisyanı razılaşdırmaq mümkün olmasa cəbhədə vəziyyətlərin yenidən gərginləşəcəyini gözləmək olar.

Bütün bunlar Moskva və Vaşinqtonun mövqeyindən, daha dəqiq isə, onların Sarkisyana imtina edə bilməyəcəyi şərtlər təklif edə bilib-bilməyəcəyindən asılı olacaq. -02В-