Azərbaycan və Macarıstan strateji əlaqələri gücləndirir - Orban və Əliyevin brifinqi

Bakı/30.01.23/Turan: Azərbaycan və Macarıstan 10 ildən artıqdır ki, fəal əməkdaşlıq edir və əlaqələri dərinləşdirir. Bunu bazar ertəsi Budapeştdə Macarıstanın Baş naziri Viktor Orban Azərbaycan Prezidenti İlham Əliyev ilə birgə keçirdiyi brifinqdə deyib.

"Bu gün sadəcə dostların görüşü deyildi, strateji məsələlər ətrafında müzakirələr aparıldı və strateji əlaqələrimiz yeni səviyyəyə qaldırıldı", - Orban deyib.

O, beynəlxalq münasibətlərdə böyük təhlükələrin olduğunu qeyd edib. Qonşuluqdakı müharibə və Brüsselin sanksiyaları Macarıstan üçün çox təhlükəli vəziyyət yaradıb. Macarıstanın və Avropanın enerji təhlükəsizliyi  çox ciddi mərhələdədir. Bu vəziyyət bizim həmişə dostumuz olan, indi isə bütün Avropa üçün strateji tərəfdaşa çevrilmiş Azərbaycanın əhəmiyyətini xeyli artırır”, - Orban bildirib.

O cümlədən, Azərbaycandan Avropaya təkcə qazın deyil, həm də elektrik enerjisinin tədarükü haqqında saziş imzalanıb. Bu enerjinin bir hissəsi də Macarıstana gedəcək.

Belə infrastrukturun yaradılması böyük investisiyalar tələb edəcək və artıq Rumıniya, Bolqarıstan və Slovakiya ilə müvafiq danışıqlar aparılır.

Viktor Orban qeyd edib ki, elektrik enerjisi Qara dənizin dibi boyunca kabel vasitəsilə Avropaya çatdırılacaq.

İlham Əliyev öz növbəsində vurğulayıb ki, bu gün imzalanan strateji əməkdaşlıq sənədi ikitərəfli münasibətlərin səviyyəsini və xarakterini nümayiş etdirir.

O, vaxtilə Avropanın enerji təhlükəsizliyini təmin etmək üçün nəzərdə tutulan, lakin baha başa gəldiyi üçün təxirə salınan NABUCCO layihəsini xatırladıb.

“Buna baxmayaraq, Azərbaycan özü enerji ehtiyatlarını Avropaya çatdırmaq məsələsini həll edib. Uzunluğu 3500 km olan “Cənub Qaz Dəhlizi” layihəsi NABUCCO-ya alternativ olub və Avropanın təhlükəsizliyi problemini həll edir”.

Azərbaycan qazı artıq Bolqarıstan və Rumıniyaya verilir və tezliklə Macarıstana, daha sonra isə digər ölkələrə gələcək.

Yaşıl elektrik isə Azərbaycandan Gürcüstan, Bolqarıstan və Rumıniya vasitəsilə Avropaya gələn digər enerji resursu olacaq.  Bütün bunlar ciddi sərmayələr tələb edir və Azərbaycan Avropa Komissiyasının vəsaitlərin ayrılmasında iştirakına ümid edir.

Digər layihə Avropa və Asiya ölkələri arasında ticarət əlaqələrinin inkişafı üçün nəqliyyat kommunikasiyalarından istifadə edilməsidir. Əliyev bildirib ki, Azərbaycan coğrafi mövqeyinə görə bütün bu layihələrdə mühüm rol oynayır.

O, həmçinin Macarıstanın Azərbaycanın işğaldan azad edilmiş ərazilərinin minalardan təmizlənməsi və bərpasında iştirak edəcəyinə ümid etdiyini bildirib. -02D-