Azərbaycan və Qırğızıstan prezidentləri MDB sammitinə məhəl qoymadılar

Aşqabadda MDB-nin bir günlük sammitinin yekunlarına görə 20 sənəd imzalanıb, bu barədə RİAN xəbər yayıb. Xüsusən, MDB iştirakçısı olan ölkələrin hərtərəfli əməkdaşlığın gələcək inkişafı haqqında bəyannaməsi imzalanıb.

İclas iştirakçıları həmçinin Birliyin inteqrasiya edilmiş valyuta bazarının təşkilində əməkdaşlıq haqqında saziş imzalayıblar.

İclasda MDB ölkələri Maliyyə Kəşfiyyatı İdarələri Rəhbərləri Şurası yaratmaq qərara alınıb.

Dövlət başçıları həmçinin Birlik üzvü olan ölkələrin səlahiyyətli orqanlarının təhsil müəssisələrində antiterror şöbəsi mütəxəssislərinin hazırlanmasında əməkdaşlığı haqqında  saziş imzalayıblar. Bundan başqa, terrorizmə və ekstremizmin digər zorakı təzahürlərinə qarşı mübarizə aparan səlahiyyətli orqanların maddi-texniki təminatında əməkdaşlıq haqqında saziş imzalanıb.

İclasın yekunlarına görə MDB hava hücumundan birgə müdafiə sisteminin inkişafının perspektivli istiqamətləri müəyyən olunub.

Həmçinin, 2013-cü ildə Azərbaycan, Ermənistan və Belarusda “Birliyin mədəniyyət paytaxtları” dövlətlərarası proqramının həyata keçirilməsi haqqında qərar imzalanıb. Dövlət başçıları həmçinin MDB-də sədrlik haqqında və MDB dövlət başçıları şurasının növbəti iclasının keçirilməsi haqqında qərarlar imzalayıblar.

Aşqabaddakı iclasda həmçinin Böyük Vətən Müharibəsində qələbənin 70-ci ildönümünün qeyd edilməsinə hazırlıq və MDB ölkələri parlamentlərarası assambleyasının inteqrasiya fəaliyyətinin möhkəmləndirilməsi fəaliyyəti haqqında qərarlar imzalanıb.

Dövlət başçıları MDB ölkələrinin sərhəd və digər idarələrinin xarici sərhədlərdə böhran vəziyyətlərinin yaranması və aradan qaldırılması zamanı köməklik göstərilməsində qarşılıqlı fəaliyyətinin təşkili haqqında 5 oktyabr 2007-ci il tarixli əsasnamənin təsdiqi barədə protokolun həyata keçirilməsi üzrə tədbirlər planı imzalayıblar. 

İclasda MDB ölkələrinin Antiterror Mərkəzinin rəhbəri haqqında qərar qəbul edilib.

Dövlət başçıları 2013-cü ilin MDB-də Ekoloji Mədəniyyət və Ətraf Mühitin Müdafiəsi İli elan edilməsi haqqında qərar qəbul ediblər. 1 yanvar 2013-cü ildən Türkmənistandan Müstəqil Dövlətlər Birliyində sədrliyi alacaq Belarus ekologiya və ətraf mühitin müdafiəsi problemlərinə xüsusi diqqət yetirmək niyyətindədir. Bu barədə Aşqabadda Belarus prezidenti Aleksandr Lukaşenko bildirib.

Azərbaycan və Qırğızıstan prezidentləri daxili məsələlərlə yükləndiklərini əsas gətirərək, MDB sammitinə məhəl qoymayıblar. Azərbaycanı sammitdə baş nazir Artur Rasizadə, Qırğızıstanı isə baş nazirin birinci müavini Coomart Otorbayev təmisl edir. -0-