Azərbaycan və RF prezidentləri iqtisadi əməkdaşlıq və Qarabağ məsələlərini müzakirə edəcəklər

Bakı/30.08.18/Turan: Azərbaycan prezidenti İlham Əliyev sentyabrın 1-də RF-yə səfər edəcək. Soçidə Rusiya prezidenti ilə keçiriləcək görüşün əsas mövzuları iqtisadi əməkdaşlığın genişləndirilməsi və Qarabağ nizamlanması məsələləri olacaq. Bu barədə "Exo Moskvı" radiosunun efirində Azərbaycan Prezident Administrasiyasının sektor müdiri Fuad Axundov bildirib.

Onun sözlərinə görə, hər iki ölkənin prezidenti "biznesmenlərimizin fəal şəkildə əməkdaşlıq etməsini istəyirlər" və "öz biznesmenləri üçün daha əlverişli şəraiti" təmin etməyə çalışırlar.

"Bizim tərəfimiz hamını tranzit imkanlarımızda iştirak etməyə dəvət etməyə çalışaca", deyə Axundov bildirib.

O, həmçinin qeyd edib ki, görüş çərçivəsində Qarabağ məsələsinə də toxunulacaq. Onun sözlərinə görə, Rusiyanın Ermənistan və Azərbaycan arasında qarşılıqlı münasibətlərin yaxşılaşdırılmasına şərait yaratmaq üçün "daha çox imkanı var". -06D-