Azərbaycan vətəndaşları ABŞ-da casusluğa görə saxlanılıblar?

ABŞ-da casusluğa görə saxlanılan 11 nəfərin arasında həm etnik azərbaycanlılar, həm də bizim ölkənin vətəndaşları var. Beynəlxalq mətbuatın bununla bağlı məlumatından belə nəticəyə gəlmək olar.

Onların arasında Azərbaycan vətəndaşları kimi Sevinc Tağıyeva, Aleksandr Fişenko və Şövkət Abdullayevin adları çəkilir. Həbs olunmuş digər şəxsin – Posobilovun keçmiş həyat yoldaşı və qızı hazırda Azərbaycanda yaşayır. Onun özünün isə həm Azərbaycan, həm də Rusiya vətəndaşlığı var.

Onlar ABŞ-dan Rusiyaya mikroelektronikanın qanunsuz daşınmasında ittiham olunurlar və oktyabrın 2-də Hyustonda saxlanılıblar. Onlara qarşı cinayət sövdələşməsi və ümumi məbləği 50 mln. dollara yaxın yüksək texnoloji  avadanlığın lisenziyasız ABŞ-ın hüdudlarından kənara çıxarılmasını qadağan edən qanunun pozulması ilə bağlı ittiham irəli sürülüb.

Daşınan avadanlıq yeni MİQ-35 hərbi təyyarələri və yeni sualtı qayıqlar üçün nəzərdə tutulub. 

Amerikalı müstəntiqlər üç il həmin şəxslərin elektron yazışmalarını izləyiblər və telefon danışıqlarını dinləyiblər.

Azərbaycan XİN hələlik vəziyyəti şərh etmir. Lakin məlumdur ki, Vaşinqton səfirliyinə vəziyyətin araşdırılması və həmin şəxslərin həqiqətən Azərbaycan vətəndaşları olub-olmamasının aydınlaşdırılması tapşırılıb. -02D-