Azərbaycan XİN ABŞ Dövlət Departamentinin tövsiyələrinə təəccüblənib

Bakı/11.01.18/Turan: Azərbaycan XİN ölkənin ABŞ Dövlət Departameninin Amerika vətəndaşlarına təhlükəsizlik təhdidi ilə əlaqədar səfər etməməyi tövsiyə etdiyi dövlətlər siyahısına salınmasına təəccübünü ifadə edib.

Xüsusən, ABŞ Dövlət Departamenti Amerika vətəndaşlarını terror riskinin artması ilə əlaqədar Azərbaycana səfərlərdən yayınmağa çağırıb.

XİN-in rəsmi nümayəndəsi Hikmət Hacıyev bildirib ki, son bir ildə turistlərin Azərbaycana axını 24% artaraq, 2,7 mln. nəfər təşkil edib.

Bakıda bir sıra beynəlxalq tədbirlər: I Avropa Oyunları, IV İslam Həmrəyliyi Oyunları, Formula-1 yarışları, mədəniyyətlər və dinlərarası dialoq forumları, digər yüksək səviyyəli siyasi, iqtisadi, idman və mədəniyyət xarakterli mötəbər tədbirlər, o cümlədən ABŞ və Rusiya Baş qərargah rəislərinin, NATO hərbi komitəsinin rəhbərinin və Rusiya Baş qərargah rəisinin görüşləri kimi tədbirlər keçirilib.

Buna görə, Dövlət Departamentinin tövsiyələri "təəccüblü" səslənir, deyə Hacıyev bildirib. Bu dərəcədə mötəbər tədbirlərin keçirilməsi ölkədə sabitliyin, təhlükəsizliyin və ictimai asayişin yüksək səviyyədə təmin edilməsi ilə bağlıdır. Ermənistanın silahlı qüvvələri tərəfindən işğal edilmiş ərazilər istisna olmaqla, Azərbaycan hökuməti təhlükəsizliyi tamamilə təmin edir və operativ vəziyyətə nəzarət edir, deyə o qeyd edib. -06D-