Azərbaycan XİN Avropa Parlamentinin deputatlarının Qarabağa səfəri barədə

Bakı/30.08.18/Turan: "Azərbaycanın Ermənistan Silahlı Qüvvələri tərəfindən işğal olunmuş ərazilərinə klounların və təlxəklərin qastrolları davam edir. Növbəti kloun isə Avropa Parlamentinin deputatı, yalnız bir nəfərdən ibarət siyasi partiyanın rəhbəri, siyasi təlxək və marginal Martin Sonneborndur", - Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev bildirib.

O qeyd edib ki, bu adamın siyasi təbliğat posterinə baxmaq kifayətdir: "Brüsseldə erməni lobbisinin rəhbəri Kaspar Karampetyan çoxlu pullar xərcləyərək çarəsizlikdən yalnız kloun siyasətçiləri Azərbaycanın işğal olunmuş ərazilərinə gətirə bilir. Çünki sağlam düşüncəli insanlar münaqişənin əsl reallıqlarını, işğal və qanlı etnik təmizləmə faktlarını öyrənərək kimin kim olduğunu dərk edir və ondan kənar dururlar. Hətta deyərdim ki, erməni lobbist Karampetyan öz biznes pulları hesabına əvvəllər bu kimi səfərlər təşkil edərək özü də bilmədən işğalın əsl həqiqətlərinin bəzi lazımı insanlara çatdırılmasına xidmət edib. Maraqlıdır, görəsən klounlar paradında növbəti kim olacaq, Kardaşyan bacılarımı?" mətbuat xidmətinin rəhbəri sual edir.

Martin Sonneborn Almaniyadan parlamentə deputat seçilib. O, qalmaqallı, ekstravaqant bəyanatları və davranışı ilə seçilir. 2004-cü ildə Əmək, Hüquq, Heyvanların Rifahı, Elitar İnkişaf və Demokratik Təşəbbüslər Partiyasını yaradıb. Partiya xarici turistlərin ölkədən çıxarılmasını və Berlin divarının bərpasını tələb edib. -0603D-