Azərbaycan XİN rəhbərinin İsrailə səfəri münasibətlərin səviyyəsinin göstəricidir

Aprelin 22-də Qüdsdə xarici işlər nazirinin müavini Zeev Elkin Azərbaycan XİN rəhbəri Elmar Məmmədyarovla görüşüb. “Azərbaycan xarici siyasət idarəsi rəhbərinin İsrailə ilk səfəri ölkələrimiz arasında münasibətlərin səviyyəsinin nə dərəcədə yüksək olduğunu göstərir”, - Elkin qeyd edib. 

Görüş zamanı bütün sahələrdə ikitərəfli əməkdaşlığın möhkəmləndirilməsi, əsasən Beynəlxalq Əməkdaşlıq və Yardım Mərkəzinin (MAŞAV) xəttilə əlaqələrin inkişafı əsas müzakirə mövzusu olub. 

Kənd təsərrüfatı və tibb sahələrində inkişaf perspektivləri çox böyükdür. Məmmədyarov iki dövlət arasında aktiv və konstruktiv dialoqun davam etdirilməsi üçün Elkini Bakıya dəvət edib. İzrus saytı məlumat verir. 

Həmin gün Azərbaycan XİN rəhbəri İsrail prezidenti Şimon Peres ilə görüşüb. Peres terrorizmə qarşı mübarizədə Azərbaycanın rolunu yüksək qiymətləndirib. Qeyri-rəsmi məlumatlara görə, tərəflər regionda Tehranın rolunu müzakirə ediblər.

Aprelin 23-də Məmmədyarov Tel-Əvivdə tanınmış yəhudi və israilli biznesmenlərlə görüşlər keçirəcək, bir sıra şirkətlərdə olacaq.

Aprelin 24-də Məmmədyarov baş nazir Binyamin Netanyahu ilə görüşəcək, sonra Knessetə gedəcək. Onun müdafiə naziri Moşe Yaalon ilə görüşü də gözlənilir.-02D-