Azərbaycanda növbədənkənar prezident seçkilərinin təşviqat kampaniyası başlayıb

Yanvarın 15-də Azərbaycanda növbədənkənar prezident seçkilərinin təşviqat kampaniyası başlayıb. Kampaniya 6 fevral saat 08:00-da - səsvermədən bir gün əvvəl başa çatacaq.

Bu gün Mərkəzi Seçki Komissiyasında İctimai TV və radioda namizədlərə verilən pulsuz efir vaxtı üçün püşkatma mərasimi keçirilib.

Namizədlər TV-də həftədə üç dəfə - bazar ertəsi, çərşənbə axşamı və cümə günləri bir saat ərzində debat formatında çıxış edə biləcəklər.  

Çərşənbə axşamı, cümə axşamı və şənbə günləri namizədlər İctimai radionun efirində də debat formatında çıxış edə biləcəklər.

Hər bir namizəd hər dəfə 8 dəqiqə 57 saniyə efir vaxtına malik olacaq. O, bu vaxtdan bir dəfəyə və ya debat boyunca hissə-hissə istifadə edə bilər.

Püşkatmanın nəticələrinə görə namizədlər aşağıdakı ardıcıllıqla çıxış edəcəklər: 

1. Zahid Oruc (Parlamentin insan hüquqları komitəsinin sədri, Sosial Araşdırmalar Mərkəzinin rəhbəri, namizədliyini özü irəli sürüb),

2. Fazil Mustafa (Böyük Quruluş Partiyasının sədri);

3. İlham Əliyev (Yeni Azərbaycan Partiyasının sədri, hazırkı dövlət başçısı);

4. Elşad Musayev (Böyük Azərbaycan Partiyasının sədri);

5. Qüdrət Həsənquliyev (Vahid Azərbaycan Xalq Cəbhəsi Partiyasının sədri);

6. Razi Nurullayev (Milli Cəbhə Partiyasının sədri);

7. Fuad Əliyev (Liberal-Demokrat Partiyasının keçmiş sədri, namizədliyini özü irəli sürüb).

İctimai TV-də pulsuz efir vaxtı ilə yanaşı, namizədlər ödənişli əsaslarla təşviqat üçün efir vaxtı əldə etmək imkanına malik olacaqlar.

Üç telekanal - ATV, REAL TV və Xəzər TV də ticari şərtlərlə namizədlərə efir vaxtı verməyə hazırdır.

Ümumilikdə isə 44 KİV namizədlərin təşviqat materiallarını yerləşdirməyə hazırdır. Bununla yanaşı, namizədlər birbaşa seçicilərlə görüşə bilərlər. Bunun üçün ölkə üzrə 139 açıq meydança və 139 qapalı məkan olmaqla, 278 yer ayrılıb.

Bundan başqa, insanların sıx olduğu yerlərdə yerləşdirilmiş stendlərə namizədlərin çap materialları asıla bilər.