Azərbaycanda orta hesabla hər məhbusa xərclənən məbləğ 7,9 avro, Norveçdə 300 avrodur

Bakı/08.04.21/Turan: Son illər Azərbaycanda məhbuslarının sayının azalmasına baxmayaraq, ölkə bu göstəriciyə görə Avropa Şurası ölkələri arasında liderlər qrupunda qalmaqdadır.

31 yanvar 2020-ci il tarixinə olan məlumata görə, Azərbaycanın penitensiar müəssisələrində ümumilikdə 21 021 məhbus olub, bu, 2019-cu (21 926) və 2018-ci illə (23 319) müqayisədə azdır.

2020-ci il yanvarın 31-nə Avropada ümumilikdə hər 100 000 sakinə 103,2 məhbus düşürdüsə, Türkiyədə bu göstərici 357, Rusiyada 356, Gürcüstanda 264, Litvada 220, Azərbaycanda 209 nəfər təşkil edib.

Bu məlumatlar Avropa Şurasının bu gün dərc etdiyi “Avropada həbsxanalar və məhbuslar – 2020” məruzəsində əksini tapıb.

Azərbaycanda həbsxanalarda sıxlıq göstəricisi orta Avropa göstəricisindən aşağıdır. Belə ki, 2020-ci ildə Avropada həbsxanaların orta sıxlığı hər 100 yerə 90,3 məhbus təşkil edirdi.

Azərbaycanda penitensiar müəssisələrin ümumi yer sayı 25 501 olmaqla, hər 100 yerə düşən məhbus sayı 82,4% təşkil edib. Bu, orta Avropa göstəricisindən (90,3) və Azərbaycanın 2019-cu ildəki göstəricisindən (86%) azdır.

AŞ ölkələrində həbsxanalarda 87 367 qadın saxlanılıb, bu, orta hesabla məhbusların ümumi sayının 4,9%-ni təşkil edir.

Azərbaycan qadın məhbusların payı ən az olan (570 qadın və ya məhbusların ümumi sayının 2,7%-i) ölkələr beşliyinə daxildir.

Yetkinlik yaşına çatmayanlara gəlincə, Azərbaycan həbsxanalarında 57 yetkinlik yaşına çatmamış kişi və 1 yetkinlik yaşına çatmamış qadın olub. Azərbaycanda azyaşlı uşaqların 3 ilə qədər anaları ilə birlikdə penitensiar müəssisələrdə qalmasına icazə verilir.

2020-ci il yanvarın 31-nə olan məlumata görə, bütünlükdə Avropada məhbusların 15,4%-ni əcnəbilər təşkil edib. Azərbaycanda bu göstərici 2,4% təşkil edib. Azərbaycan orta həbs cəsazı müddəti ən uzun olan ölkələr arasında lider olub. Bu müddət Azərbaycanda 32,9 ay, Portuqaliyada 30,2 ay, Rusiyada 29 ay təşkil edib.

Azərbaycanda məhbusların 10,7%-i 1 ildən 3 ilədək, əksəriyyət (47,3%) 3 ildən 5 ilədək, 27,1%-i 5 ildən 10 ilədək, 13,2%-i 10 ildən 20 ilədək cəza çəkib. Məhbusların 1,6%-i ömürlük həbsə məhkum edilib.

Avropa həbsxanalarında orta ölüm səviyyəsi 2019-cu ildə hər 10 000 məhbusa 27,2 hadisə təşkil edib.

Əhalisi 500 000 nəfərdən çox olan ölkələr arasında həbsxanalarda intihar səviyyəsi ən yüksək olan ölkələr Malta (10 000 məhbusa 25,2), Ermənistan (22,5), Danimarka (21,7), Norveç (19), Fransa (17) və Estoniya (16,3) olub.

2019-cu ildə Azərbaycan penitensiar müəssisələrində 93 nəfər vəfat edib (2 intihar). Beləliklə, 2019-cu ildə hər 10 000 nəfər üzrə ölüm səviyyəsi 44,3 hadisə təşkil edib ki, bu da orta Avropa göstəricisindən xeyli yüksəkdir.

2019-cu ildə Avropa Şurası ölkələrində hər məhbus üçün bir gündə xərclənən orta məbləğ 64,4 avro təşkil edib, bu, 2018-ci (68,3 avro) və 2017-ci illə (66,5 avro) müqayisədə azdır. Bu göstərici Rusiya Federasiyasında ən azdan (bir gündə hər məhbusa 2,8 avro) İsveç və Norveçdə təqribən 300 avroya qədər dəyişib.

Azərbaycanda 2019-cu ildə həbsxana administrasiyasının ümumi büdcəsi 55 091 752 avro təşkil edib. Bir məhbusa bir gündə xərclənən orta məbləğ 7,9 avro təşkil edib. –06D-