Azərbaycanın Dövlət Komissiyasının meyitlərin və hərbi əsirlərin dəyişdirilməsi haqqında məlumatı

Bakı/17.12.20/Turan: Azərbaycan və Ermənistan tərəfi Rusiya sülhməramlılarının və Qırmızı Xaç Komitəsinin əməkdaşlarının vasitəçiliyi ilə müharibə zamanı həlak olan şəxslərin meyitlərinin ərazidən götürülməsi işlərini davam etdirir. Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının işçi qrupu rəhbərinin müavini Eldar Səmədov bildirib.

Proses başlayandan bu günədək döyüş bölgəsindən 314 Azərbaycan hərbçisinin, 775 Ermənistan hərbçisinin meyiti çıxarılıb. Hazırda bu proses davam etdirilir, deyə o qeyd edib.

Azərbaycan tərəfi indiyədək ümumilikdə 54 nəfər ermənini təhvil verib. Onların bir hissəsi sentyabrın 27-nə qədər, yəni hərbi əməliyyatlar başlamazdan əvvəl Azərbaycan ərazisində saxlanılıb.

Onun sözlərinə görə, Ermənistanda üç Azərbaycan vətəndaşı əsir saxlanılır və Bakı Ermənistandan onların azad edilməsini tələb edir, deyə Səmədov qeyd edib.

Qeyd edək ki, son günlər Füzuli və Cəbrayıl rayonları ərazisində axtarış işləri aparılır. Bu ərazilərdə amansız döyüşlər gedib. -02D-