Azərbaycanın hərbi rəhbərliyi Qarabağdakı vəziyyəti müzakirə edib

Bakı/28.03.22/Turan: Azərbaycan müdafiə naziri Zakir Həsənov bazar ertəsi Mərkəzi Komanda Məntəqəsində müavinlərinin, qoşun növləri komandirlərinin və idarə rəislərinin iştirakı ilə xidməti müşavirə keçirib.

Videorabitə vasitəsilə azad edilmiş ərazilərdə yerləşən hərbi hissələrin, birləşmələrin komandirləri və digər zabitlər də müşavirəyə qoşulublar.

Müşavirədə Azərbaycan-Ermənistan dövlət sərhədindəki vəziyyət və Azərbaycanın Qarabağ iqtisadi zonasında əməliyyat şəraiti ətraflı müzakirə olunub.

Həsənov Azərbaycan SQ hərbi hissələrinin yüksək döyüş hazırlığının qorunub saxlanması və ayıqlığın artırılması ilə bağlı tapşırıqlar verib. Eyni zamanda, döyüş şəraitinə yaxın şəraitdə intensiv təlim və tətbiqi məşğələlər keçirilməsi haqqında təlimat verilib.

Nazir komandirlər və rəislər qarşısında şəxsi heyətin yeni alınmış müasir silahlardan, texnika və digər döyüş vasitələrindən istifadəyə hazırlığını təmin etmək vəzifəsi qoyub. -06В-