Azərbaycanla Gürcüstan arasında əməkdaşlıq planı imzalanıb

Dekabrın 16-da Azərbaycanın və Gürcüstanın Müdafiə nazirlikləri arasında 2017-ci il üçün əməkdaşlıq planı imzalanıb.

Xəbəri Müdafiə Nazirliyi yayıb.

Sənəd Azərbaycanın və Gürcüstanın müdafiə nazirləri Zakir Həsənov və  Azərbaycanda səfərdə olan Gürcüstanın Müdafiə naziri Levan İzoria imzalayıb.  

Z.Həsənov hər iki ölkənin hərbi əməkdaşlığının ikitərəfli və NATO çərçivəsində, eləcə də Azərbaycan-Türkiyə-Gürcüstan hərbi qurumları formatında aparıldığını xatırladıb. 

Z.Həsənov vurğulayıb ki, gələn ildə də ikitərəfli və üçtərəfli təlimlərin keçirilməsi planlaşdırılır.

Z.Həsənov ölkələrimizin hərbi qurumları arasında 2017-ci il üçün əməkdaşlıq planının səmərəli tərəfdaşlığımızın möhkəmləndirilməsinə xidmət edəcəyinə əminliyini bildirib. 
Azərbaycanın Müdafiə naziri görüşdə Ermənistanın regional sabitliyə əsas təhlükə yaratdığını, işğalçı ölkənin dövlət səviyyəsində daim separatizmi dəstəklədiyini diqqətə çatdırıb.

L.İzoria onu da bildirib ki, gələn ildən Gürcüstan da Azərbaycan ilə Türkiyə arasında keçirilən birgə hərbi təlimlərdə iştirak etməyə hazırdır.-05D-