Azərbaycanla İtaliya əməkdaşlıq sahələrini genişləndirir

Bazar günü Bakıda prezident İlham Əliyevlə İtaliya Nazirlər Şurasının prezidenti Enriko Lettanın görüşündə əsas mövzulardan birində enerji sahəsində əməkdaşlıq olub.

Danışıqlardan sonra keçirilən brifinqdə İ.Əliyev deyib ki, TAP (Transadriatik qaz kəməri) layihəsinin reallaşması əməkdaşlıq üçün yeni imkanlar açır.

“Bizim layihələr Avropada enerji təhlükəsizliyini təmin edəcək, eyni zamanda Avropa İttifaqının yeni böyük bazarlarını bizim üçün açacaq”, - İ.Əliyev qeyd edib.

Bununla yanaşı o, digər sahələrdə - inşaat, turizm, kənd təsərrüfatı sahələrində geniş əməkdaşlıq potensialının olduğunu bildirib.

Öz növbəsində  E.Letta deyib ki, TAP nəinki İtaliya üçün, həm də bütün region üçün vacibdir.

Qarabağ nizamlanmasına toxunan Letta qeyd edib ki, belə vəziyyətlərdə status-kvo-nun saxlanması çıxış yolu deyil. Onun sözlərinə görə, İtaliya münaqişənin beynəlxalq normalar əsasında dinc yolla həlli ilə bağlı ATƏT-in Minsk Qrupunun səylərini dəstəkləyir.

O deyib ki, 2014-cü ildə İtaliya Aİ-də sədrlik edəcək və bu müddətdə belə münaqişələrin həllinə yönələn addımların dəstəklənməsi məqsədilə müəyyən tədbirlər həyata keçirmək niyyətindədir.—06D-