Azərbaycanlı siyasi məhbus doktor Qubad İbadoğlunun ailəsi BMT-ni Bonn iqlim görüşlərində hərəkətə keçməyə çağırır

Azərbaycanlı siyasi məhbus, İqtisad elmləri doktoru Qubad İbadoğlunun ailəsi Birləşmiş Millətlər Təşkilatını COP 29 sammitindən əvvəl Bonda keçiriləcək iqlim məsələlərinə dair beynəlxalq danışıqlara müdaxilə etməyə çağırıb, bu barədə Global Witness-in məqaləsində bildirilir.

Kampaniya iştirakçıları Azərbaycanın mədən yanacaqları sənayesinin açıq-aşkar tənqidçisi olan məşhur iqtisadçıya qarşı amansız rəftara diqqət çəkir.

London İqtisadiyyat Məktəbinin baş elmi əməkdaşı doktor İbadoğlu ötən ilin yayında Azərbaycanda çoxlarının yalan hesab etdiyi ittihamla həbs olunub. O, hələ də Bakıda ev dustaqlığındadır, səhhətində ciddi problemlər var və o, lazımi tibbi yardım almır.

İbadoğlunun qızı Jalə Bayramova Bonn görüşlərində iştirak edib və öz qəzəbini dilə gətirib: “Əliyev diktaturasının hakimiyyəti dövründə atam və digər siyasi məhbuslar həbsdə olarkən Azərbaycanın Bonn danışıqlarında iqlim lideri kimi qələmə verilməsi ikrah hissi doğurur. Atam fəallığına və neft-qaz gəlirlərini, ətraf mühitə təsiri və korrupsiyanı araşdırdığına görə cəzalandırılır. O, təcili ürək əməliyyatı keçirməlidir və hətta ev dustaqlığında belə tibbi yardımdan məhrumdur. BMT atamın azad olunması və beynəlxalq iqlim prosesinin legitimliyinin qorunması üçün Azərbaycan rejiminə təsir göstərməlidir”.

Global Witness danışıqlar zamanı nümayəndələr qarşısında və Bonn konfransının keçirildiyi binanın görünən yerlərində doktor İbadoğlunun şəklini nümayiş etdirib, Azərbaycan hökumətini onu azad etməyə çağırıb.

Global Witness həmçinin COP 29-un prezidenti olan Azərbaycanın ekologiya və təbii sərvətlər nazirinə qarşı rəsmi şikayət verib. Şikayətdə iddia olunur ki, Babayev doktor İbadoğlunu həbsdə saxlamaqda davam edən rejimi təmsil edərək, BMT İqlim Sazişini pozur.

Doktor İbadoğlu Azərbaycanın neft-qaz siyasətinin tənqidi yer alan məqaləsini dərc etməsindən və oğurlanmış dövlət sərvətlərinin Azərbaycan xalqına qaytarılmasına yönəlmiş xeyriyyə fondunun yaradılmasında iştirak etməsindən sonra həbs olunub. Onu 17 ilədək azadlıqdan məhrumetmə cəzası gözləyir.

Doktor İbadoğlu həbsdə olarkən zəruri tibbi yardımdan məhrum olub, bu isə, onun diabet xəstəliyi və yüksək qan təzyiqi olduğunu nəzərə alaraq, həddindən artıq vacibdir. Onun sağlamlığı pisləşməkdə davam edir. Apreldə ev dustaqlığına keçirildiyi andan etibarən Azərbaycan hakimiyyəti onun zəruri tibbi yardım əldə etmək imkanını məhdudlaşdırmaqda davam edir.

Doktor İbadoğlunun ailəsi vətəndaş cəmiyyəti qrupları koalisiyası ilə birlikdə onu dərhal və qeyd-şərtsiz azad etməyə, habelə Azərbaycanda digər siyasi məhbusları azad etməyə çağırır.

Azərbaycanda mədən yanacağı sektorunun əsas xarici investorları BP və TotalEnergies-dir, bu şirkətlər bu yaxınlarda Xəzər dənizində yeni qaz yatağı kəşf ediblər. Aprel ayında doktor İbadoğlunun oğlu İbad Bayramov hər iki şirkətə məktub göndərərək, atasının azad edilməsini dəstəkləməyə çağırıb. Lakin indiyədək bu şirkətlərdən cavab gəlməyib.