Bakı BMT-nin xüsusi məruzəçilərinin Qarabağın “blokadası” ilə bağlı ittihamlarına cavab verib

Bakı/08.08.23/Turan: BMT-nin İnsan Hüquqları Şurasının bir sıra xüsusi məruzəçiləri və müstəqil eksperti avqustun 7-də Dağlıq Qarabağ regionunda humanitar böhrana səbəb olan Laçın dəhlizinin Azərbaycan tərəfindən davam edən blokadası ilə bağlı narahatlığını bildirib. 

Bu barədə  onların yaydığı bəyanatda deyilir.

Bəyanatda deyilir ki, Laçın dəhlizinin blokadası humanitar fövqəladə vəziyyətə çevrilib, nəticədə əsas ərzaq və tibbi ləvazimatların kəskin çatışmazlığı yaranıb və bu, sürətlə tükənməkdədir və təcili yardım maşınlarının yanacağı tükəndiyi üçün xəstəxanalar tibbi yardım göstərməkdə çətinlik çəkirlər.

Ekspertlər Azərbaycan hakimiyyətini 2020-ci ilin noyabrında atəşkəs haqqında sazişə uyğun olaraq Laçın dəhlizi ilə hər iki istiqamətdə hərəkət edən insanların, nəqliyyat vasitələrinin və yüklərin sərbəst və təhlükəsiz hərəkətini dərhal bərpa etməyə çağırıblar.

Ekspertlər həmçinin bölgədə yerləşdirilmiş Rusiya sülhməramlı qüvvələrini atəşkəs razılaşmasının şərtlərinə uyğun olaraq dəhlizi qorumağa çağırıblar.

"Biz Azərbaycan hökumətini insan hüquqlarına, o cümlədən qida, sağlamlıq, təhsil və yaşama hüququna hörmət və mühafizə üzrə beynəlxalq öhdəliklərini yerinə yetirməyə çağırırıq. Həmçinin sülh və dayanıqlı sülh yolu tapmaq üçün bütün tərəflər arasında əməkdaşlıq və dialoqun vacibliyini vurğulayırıq ”- deyə bəyanatda qeyd edilir. 

Öz növbəsində Azərbaycan Xarici İşlər Nazirliyi BMT İnsan Hüquqları Şurasının ekspertlərinin Laçın yolu ilə bağlı iddialarını rədd edib.

“BMT-nin İnsan Hüquqları Şurasının bəzi xüsusi məruzəçilərinin və müstəqil ekspertinin Laçın dəhlizinin Azərbaycan tərəfindən bağlandığını və Qarabağda “gərgin humanitar vəziyyətin” yarandığını deməsi təəssüf doğurur.

Azərbaycan XİN bir daha bəyanatda  Ermənistan öhdəliklərinə zidd olaraq, silahlı qüvvələrini  Azərbaycan torpaqlarından tam olaraq çıxarmamaqla yanaşı, Laçın yolu vasitəsilə onların rotasiyasını həyata keçirərək silah-sursatla təchiz edilməsini xatırladıb.

“Bütün bunlar BMT və digər beynəlxalq təşkilatlar tərəfindən susqunluqla qarşılanıb.

Azərbaycan məhz öz sərhədlərinə nəzarət və Ermənistanın qeyri-qanuni fəaliyyətinin qarşısını almaq məqsədilə, özünün suveren ərazilərində Laçın sərhəd buraxılış məntəqəsi təsis edib. Beynəlxalq Ədalət Məhkəməsinin də 6 iyul tarixli qərarında bu sərhəd buraxılış məntəqəsinin aradan qaldırılması ilə bağlı müraciəti yekdilliklə rədd etməsi, bir daha Ermənistan tərəfinin iddialarının əsassız olduğunu sübut edib.

Azərbaycan tərəfindən erməni sakinlərin, Beynəlxalq Qızıl Xaç Komitəsinin (BQXK) və Rusiya sülhməramlı kontingentinin sərhəd buraxılış məntəqəsindən keçidinin təmin olunmasına baxmayaraq, Ermənistan tərəfi ərazilərimizdə qeyri-qanuni fəaliyyətini davam etdirmək məqsədilə, bölgədə saxta “gərgin humanitar vəziyyət” barədə iddialar yayıb.

“Bütün bu təxribatlara baxmayaraq, Azərbaycan tərəfi BQXK tərəfindən erməni sakinlərin keçidinə şərait yaradır.

Azərbaycanın suveten ərazilərində yaşayan erməni sakinlərin ehtiyaclarının qarşılanması məsələsinə gəldikdə isə, bunun üçün Azərbaycan tərəfindən “Ağdam-Xankəndi” yolundan və digər alternativ yollardan istifadə daxil olmaqla, bir sıra təkliflər irəli sürülməsinə və onların Avropa İttifaqı, BQXK tərəfindən dəstəklənməsinə baxmayaraq, erməni tərəfinin bu təkliflərə qarşı çıxması, alternativ yollara beton maneələr düzməklə əraziyə girişi bloklaması “humanitar vəziyyət” barədə iddialarının siyasi şantaj və manipulyasiya olduğunu bir daha göstərib. -16d-