Bakı münaqişənin nizamlanması üzrə beynəlxalq mexanizmin yaradılması ilə bağlı Yerevanın ideyasını qəbul etməyib

Bakı/16.02.23/Turan: Azərbaycan Xarici İşlər Nazirliyi Bakı və Qarabağ arasında danışıqlar üçün beynəlxalq mexanizmin yaradılması ilə bağlı Yerevanın təklifini qəbul etməyib. Bu təklif barədə fevralın 15-də Ermənistanın Təhlükəsizlik Şurasının rəhbəri Armen Qriqoryan danışıb.

Azərbaycan Xarici İşlər Nazirliyinin mətbuat xidmətinin rəhbəri Ayxan Hacızadə bu ideyanı tənqid edərək manipulyasiya adlandırıb.

"Ermənistanın Qarabağ ermənilərinin hüquq və təhlükəsizliyinin beynəlxalq müdafiə mexanizminin yaradılması təşəbbüsü və bu barədə müddəaların Azərbaycanla Ermənistan arasında ikitərəfli sülh sazişi layihəsinə daxil edilməsi cəhdi tamamilə əsassızdır. Bu cür cəhdlər heç bir nəticə verməyəcək", - Xarici İşlər Nazirliyinin nümayəndəsinin şərhində deyilir.

Hacızadənin sözlərinə görə, Yerevanın bu cəhdləri göstərir ki, Ermənistan Azərbaycana qarşı ərazi iddialarından əl çəkməyib, baxmayaraq ki, Praqa və Soçi razılaşmalarına görə, tərəflər bir-birinin ərazi bütövlüyünü tanıyırlar.

Qarabağ Azərbaycanın ayrılmaz hissəsidir və erməni  əhalinin hüquq və təhlükəsizliyi Azərbaycan Konstitusiyası çərçivəsində təmin ediləcək. Qarabağ ermənilərinin reinteqrasiyası Azərbaycanın daxili məsələsidir və ermənilərin bu prosesə müdaxiləsi qəbuledilməzdir, - o deyib. 02D